SEKAR CATUR

1
Kaka hayu urang sakola - nanya tek matak reuwas
Meungpeung urang jagjag tur ngora - puguh ari kitu tea mah
Mangga urang sasarengan - kamana ?
Nungtut nyiar elmu
Pan keur kamajuan - alus pisan eta ajakan teh

Ieuh, lain Kaka teu hayang - harr na kedah kumaha?
Rasa keukeuh rada salempang - salempang leresan manana?
Najan ujian lugina
Sakola terusna, duh hese katampa - ahh kaka mah kecing
- Naha kaka geuning horeaman
+ Mun teu kitu, sok sieun kawiwirangan
- Duuh kaka, ngeplek jawer ngandar jangjang
+ Sanes kaka ngeplek jawer, ngan kaka teu weleh mangmang

2
Kaka mangga urang diajar - hayu da kawajiban
Meungpeung ngora kedah motekar - meungpeung euweuh pikiraneun
Sangkan hirup teu kasasar - ari kitu!
Kaka ge piraku - Nya teu hoyong jembar
puguh wae hayang pisan

Ieuh Nyai lamun keur ngelmu- kedah kumaha?
Entong make murukusunu - naha da sasari ge tara
Geuning ka Ibu ngarenghik - iraha?
Nangis mudut artos
Leuh ngagaleuh lipstik - lah jijieunan kaka mah

- Geuning kaka bet usilan teuing
+ Lain usil, kaka mah ukur ngelingan
- Duuh kaka, piwuruk kaka katampi
+ Sukur mun daek digeuing, ngan ulah rek deui-deui

3
Lamun kaka sarapan pagi - kudu dahar naon cing?
Poma ulah arek kumaki - sasari ge tara kiju mantega
Mending tuang kulub hui - euleuh atuh!
Gegentos nasi goreng atawa roti - Aduh cilaka pisan ieu mah

Najan seep hui sabaskom - mamayu
Keukeuh rasa beuteung teu cumpon - lah ku rohaka
Lamun tacan manggih sangu - sok kumaha?
Beuteung nagih eusi, lir anu mamayu - sedep tuang we ieu mah
- Saur apa, beas teh paceklik
+ Teu salempang, kapan ngadagoan milik
- Duuh kaka, palawija langkung mirah
+ Lamun kakurangan sangu, peuyeum jeung hui ge ngeunah

4
Nyai masing jongjon sakola - na kirang kumaha
Entong osok mindeng kagoda - wantun sumpah tara
Geuning kamari katara
Keur diiring-iring ku para pamuda - eta mah rerencangan latihan

Ieuh kaka ulah neuteuli - kaka mah budak bageur
Anggur junun nyiar pangarti - moal galider kaka mah
Entong sapertos kamari - na kumaha?
Kaka tepak toel jeung pamudi jengki - euh geus gerak badan eta mah

- Naha geuning nyai ku poyokan
+ Bongan tadi kaka nu ngamimitian
- Duuh Nyai, ulah rek katutuluyan
+ Abdi mah teu pisan-pisan, eta mah mung gogonjakan

SEMPAL GUYON

TUKANG SAYUR
Sayur! Sayur!
Kangkung aya beas aya
Ase cabe make jahe
Lanjung aya panas aya
Bebene midua hate

Sayur! Sayur!
Lauk asin jeung galendo
Nyiksik cabe sumolondo
Matak isin sumolondo
Ditampik rek peureum wae

- Tah tukang sayur datang
+ Mangga geura garaleuhan
- Cing kuring rek balanja
+ Sagala rupa sayaga
- Hayang kangkung jeung lobak
+ Mangga candak
- Kangkung Bandung, Lobak Garut
+ Nu keur pundung sok camerut
- Ey geuning ku celembeng
+ Kapan ngaladenan Eneng
- Ieu artosna
+ Tah sayurna, permios ka sadayana

TUKANG BORONDONG
Borondong…….
Aeh, Borondong garing, ieuh……….
Suuk aya, kacang aya
Mangga ujang garaleuhan

Borondong……..
Aeh, Borondong garing ieuh…..

Kantong kosong hayang ginding
Ngalancong loba kapusing

- Tuh Borondong garing
+ Mangga Eulis garaleuhan
- Teu nyadiakeun cai
+ Wadahna henteu sayagi
- Kuma mun hayang nginum
+ Sumur umum
- Neureuy b’rondong teu dibanjur
+ Na genggerong henteu leyur
- Ah, sieun kabuhulan
+ Sae tinggur pupundakan
- Moal cios
+ Teu sawios permios abdi rek mios
Borondong………………

TUKANG CENDOL
Cendol! Cendol!
Dagang cendol ka Cibabat
Ngadon reureuh ngan sorangan
Dagang cendol ka Cibabat
Ngadon reureuh ngan sorangan
Nya ngagembol nya merekat
Capek rahem “weureu seubeuh”, Ceuceu! Tas kaondangan

Cendol! Cendol!
Dagang cendol ka Kanoman
Meuli rujak di pengkolan
Dagang cendol ka Kanoman
Meuli rujak di pengkolan
Rek norojol rek nemonan
Asa-asa, kurang wedak, Ceuceu! Totorombolan

- Tah tukang cendol datang
+ Mangga keur landong hanaang
- Cendol tong dicaian
+ Atuh siga buburuyan
- Bongan lipstik sok luntur
+ Entong paur
- Ieu lipstik sieun ruksak
+ Nguyup apik jeung calawak
- Ah sieun kabesekan
+ Neureuy ku elak-elakan
- Moal tulus
+ Mending kitu tinimbang jeung kukulutus

TUKANG MIE
Mie! Mie!
Dagang emi dikalengan
Geus kaya rek dirugikeun
Rikrik gemi nyengcelengan
Geus loba dipahugikeun

Mie! Mie!
Dagang emi ka Cikini
Ngadon mondok di Cililin
Teu badami teu pasini
Paamprok nagih maskawin

- Mie! Mie! Cing coba ngawadahan
+ Mangga geura garaleuhan
- Cing entong mahal teuing
+ Mangga mung satengah piring
- Kuma mun hayang seubeuh
+ Campur seureuh
- Emi goreng dua porsi
+ Artos coceng beuteung eusi


- Har geuning emi godog
+ Kapan malar Eneng rewog
- Entong ngunghak
+ Entong nyentak, Mie Goreng teu aya minyak

Bandung, 10 Oktober 1962

".....?????....."

MAKE-UP
+ Nyai mah wanda perceka
- Abdi teu hoyong dipuja
+ Pujian sabalakana
- Asal tong teras ngagoda

+ Arek dijajal diuji
- Sumangga abdi sayagi
+ Menta jawaban nu sieup, Cing naon hartina “make-up?’

Deuh… Bangsa kedok istimewa
Anu bisa mindah rupa
Pipi peot jadi peungkeur
Nini-nini katembong neuhneur

Deuh… Anu tegep tambah geulis
Nu karenyut jadi luis
Sok kalinglap anu nenjo
Make “make-up” sok kabobodo

Keur pulitik : teu asup kana acara
Keur sosial : teu aya hubungan
Ekonomi : nu puguh mahal ongkosna
“make-up” mun geus luntur tembong nu aslina

MAKE-UP
+ Nyai mah ku resep dangdan
- Pan kudu milaras jaman
+ Ku seueur acuk pinilih
- Kapan meser unggal sasih

+ Ayeuna arek diuji
- Sumangga abdi sayagi
+ Menta jawaban nu pasti, Cing naon hartina “You Can See”

Deuh… Eta basa Inggris
Meureun “anjeun bisa nenjo”
Tonggong istri ngagem sinar
Anjeun mencrong teu kudu mayar

Deuh… Tonggong koneng tambah pamor
Kaasupna barang impor
Rok “you can see” pake peuting
“asup angin” henteu dihiding

Keur pulitik : angkeuhan internasional
Keur sosial : ditunggu usaha amal kaasup talajak royal puguh mahal ongkosna
Tong make “you can see “ lamun kurang modal

BIOSKOP
+ Tah Nyai geuning geus ginding
- Pan gaduh acara penting
+ Har kapan geuning keur perlop
- Kapan bade ka bioskop

+ Ayeuna Nyai dijajal
- Sumangga moal rek aral
+ Cing jawab satarabasna, “Bioskop” naon hartina?

Deuh… Rohangan tempat kuliah
Direnceng-renceng garenah
Soal cinta, kajahatan
Nyanyi-tari, kapahlawanan

Deuh… Ongkos kuliah teu mahal
Saletereun moal aral
Ka bioskop tos ngalanggan
Matak lali kana sambetan

Keur pulitik : saeutik nambah kanyaho
Keur sosial : ieu mah kapan lalajo
Ekonomi : sok loba rekening poho
Karcis geus beakeun kapaksa ti calo

HUNTU PALSU
+ Bapa teh keur ngeunah seuri
- Naon anu jadi margi
+ Pan ieu huntu geus ganti
- Paingan ku amis budi

+ Ayeuna Nyai diuji
- Sumangga abdi sayagi
+ Harti kecap “huntu palsu”, Terangkeun anu saestu

Deuh… Dianggo ku para sepuh
Nu gugusina tos uduh
Huntu palsu na gugusi
Nu tos sepuh sok anom deui

Deuh… Kuat nyapek satakerna
Leuwih kuat ti incuna
Onjoyna teh najan kolot
Ngosok huntu bari ngaheot

Keur pulitik : teu kagok dina pidato
Keur sosial : teu asup acara poko
Ekonomi : da lain talajak ogo
Make huntu palsu, dahar beuki ponyo

NV
- Bapa mah bangun nu senang
+ Kapan henteu boga hutang
- Cing atuh abdi tulungan
+ Dapon nyai teu rimbitan

- Cobi bapa rek diuji
+ Pek wae bapa sayagi
- Neda jawaban nu pasti
Cing naon hartosna “NV?”

Deuh… NV, Naamlose Vennootschaap
Rereongan layeut pisan
Tingpucunghul dimamana
Ngeduk untung paloba-loba

Deuh… NV artina “Nieuwe Vrouw”
Anyar keneh ganti bojo
Hawa dunya sok bengbatan
Modal NV pake nanyaan

Keur pulitik : teu aya sangkut pautna
Keur sosial : ditunggu sumbanganana
Ekonomi : mun jujur aya onjoyna
Nu jareneng luhur, tong milu usaha

Bandung, 4 Juni 1960

PASAMOAN

NANO.S

Adegan 1
Di imah nu rek dipake Pasamoan katinggal kasibukan pribumi dibantu ku badegana, beberes siap-siap rek narima semah.
Teu lila daratang semah nu didagoan, sabiasana anu kasemahan ti mimiti cai nepi ka opieun disayagikeun.
Bapa Uca diukna misah di juru, disangka ku pribumi mah nu ngajajapkeun salah saurang tamuna.


IBU PRIBUMI
Mangga atuh dilaleueut
Leueuteun saaya-aya
Hapunten anu kasuhun
Wireh sakieu buktosna

SADAYA TAMU
Nuhun-nuhun nuhun pisan
Sakieu ge cekap pisan
Henteu kedah ngarepotkeun
Hatur nuhun hatur nuhun

Adegan 2
Mimitina mah pada asa-asa, tapi lila-lila mah cug ceg kana lalawuh nu disadiakeun

IBU SUROTO
Abdi mah nembe tas neda can lami
Ieu mah etang-etang lalawuhna

IBU DEDY
Abdi mah tara bolu dalam negeri
Ieu mah mung hoyong nyobi raosna

IBU ISKANDAR
Abdi mah saur dokter kedah di-it
Ieu mah mung hormat kanggo pribumi

SADAYA TAMU
Euleuh-euleuh lalawuh sakedap ledis

IBU PRIBUMI
Wios-wios dipengker sayogi keneh

Adegan 3
Ibu pribumi marentah ka badegana supaya ngaluarkeun opieun deui, Si Bapa ti tukang ngagupayan siga aya piomongeun.

BAPA PRIBUMI
Ieu ibu geura gancang mimitian
Sabab lamun dililakeun
Bapa moal kabagean

IBU PRIBUMI
Tenang, tenang , bapa ulah rek hariwang
Sagembulna ibu-ibu
Geus wareg ge pasti nambru

BAPA PRIBUMI
Enya, enya
Tapi geura pek tinggali
Ditukang tinggal wadahna

Adegan 4
Si Ibu ngaleos katukang, teu lila asup deui tuluy haharewosan jeung Ibu Panitia
Cindekna mah supaya gancang dimimitian.

IBU ADE M (Panitia)
Assalamualaikum
Ka sadaya nu lalinggih
Parantos dugi waktosna
Acara urang kawitan
Cindekna ieu arisan
Ayeuna tarikan enggal

IBU TATANG
Sateuacana dibuka, di etang
Sadaya anu ngiringan, arisan
Palih ditu aya bapa naha ngiringan
Ti tatadi teu ditaros bangun isinan

BAPA UCA
Nuhun ditaros ku pangersa ibu
Nepangkeun abdi, salaki pun bojo
Dinten ieu keur wagelan
Pameng nuju ngeduk sumur

SADAYA TAMU
Heuheuheuheuheuheuhheuh, hawatos
Si bapa mani kersaan nyuluran

BAPA UCA
Kapan luyu sareng jaman, emansipasi
Lamun ibu ngeduk sumur, bapa di dapur

SADAYA TAMU
Bapak mah pinter, licik sorangan
Emansipasi janten alesan

BAPA UCA
Ibu ulah lepat hartos
Sumur na ge sumur artos
………………………………………………..

IBU RUCHIYAT
Disuhunkeun perhatosanana
Acara urang kawitan
Langkung ti payun administrasina kedah rengse
…………………………………………………

Saterasna…….
Tah ieu kocokanana
Di lebet atra kaserat
Kaunggel teu tiasa diganggu gugat
…………………………………………………

SADAYA TAMU
Koclok tah koclok koclok Hey
Saha nu kenging milik.
Enggal buka enggal buka

Adegan 5
Samemeh narima kertas kocokan saurang-saurang nyaritakeun pangalamanana


IBU WENI
Mun ngukur kekerenyedan
Sigana meunang arisan
Saatos dietang-etang
Cekap keur mayaran hutang

RAMPAK
Heuheuheuheuheuydeuh
Hayu silih du’akeun

IBU TRI
Wengi tadi abdi ngimpi
Bulan napel dina pipi
Barang bade dilesotkeun
Bapana adug-adugan

RAMPAK
Heuheuheuheuheuheuheu
Boa napel nyalahan

BAPA UCA
Bapa mah kumaha milik
Eleh meunang moal nampik
Duit ge masih gepokan
Ngan teu payu dibeulikeun

RAMPAK
Heuheuheuheuheuheuh
Kabutuh dipindingan

Adegan 6
Saurang-saurang, satutasna narima keretas kocokan tuluy dibaca

RAMPAK
IBU TATANG (maca sajak)
Cinta …… lir ibarat kalangkang
Deukeut anggang…… bisa diteang ku urang
Cinta perlu jalan anu luwes
Sologoto akhirna diancam putus …..
Duh teu ku hanteu ari nasib….


RAMPAK
Ka laut ka laut nu kalaut tong camberut
Wayahna wayahna sugan kenging sasih payun

……………Ibu Weny maju ka payun……..

Indung-indung kepala lindung
Awan mendung di kota Bandung
Bukan salah bunda mengandung
Karena bapak punya burung

Oh…burung..

RAMPAK
Ka laut ka laut nu kalaut tong camberut
Wayahna wayahna sugan kenging sasih payun

……………Ibu Pribumi

Ibu…ibu….
Mugi kauninga………
Ngagentos gardeng seep tiluratus rebu
Nyayogikeun lalawuh seep duaratus rebu
Mayar pembantu saratus rebu
Meser gelas, piring, katel, panci aya kana…. limaratus rebu.………..
Kecil sakitu mah,…anu mawi teu nanaon ka laut oge

RAMPAK
Ka laut ka laut nu kalaut tong camberut
Wayahna wayahna sugan kenging sasih payun

………….Bapak Uca kapayun………..

Diputer, dijilat, dicelup lalu….di buka
……………………………………….
Begini ibu…ibu……
Wanita bukan sapi perahan
Yang dapat dilakukan kapan-kapan
Namun kali ini……
Ternyata……bapa Uca menang total…

RAMPAK
Wilujeng
Wilujeng kenging arisan
Wilujeng
Sing mangpaat dianggona

Arisan, arisan gempungan urang
Arisan , tepung lawung unggal bulan
Arisan, arisan gempungan urang
Arisan, keur manjangkeun duduluran


Bandung, 2 Agustus 1999
MEGABRATA 74

BEREKAT KATITIH MAHAL

( Naskah Sekar & Gending : MANG KOKO )

TATA PENTAS : Kaayan di ruang tamu, opat korsi diriungkeun di tengah aya meja

PROLOG
Marengan Mang Udin asup ka pentas
Mang Udin keur boluih
Di udag kunu nagih
Sore-sore geus ngampih
Nyumput henteu kapanggih, Hey!

Mang Udin kunyam kunyem
Jeung garayam gereyem
Baeud pasemon kucem
Ku bojona dikerem, Hey!

Mang Udin keur teu nangan
Di imah ngan sorangan
Nunggu nu kikiriman
Sang bojo keur amengan, Hey!

GENDING
Keur jongjon gegelehean datang semah lalaki ginding make jas di dasi siga-siga urang kota

SEKAR
SEMAH LALAKI 1
Punten mang Udin aya di bumi
MANG UDIN
Euleuh-euleuh tara-tara ti sasari
SEMAH LALAKI 1
Pedah lawas teu patepang
Mang Udin kumaha damang
MANG UDIN
Aya hibar piker butek
Jeng kantong sering tiktikbrek
SEMAH LALAKI 1
Leres kulem ge geuning di pawon
MANG UDIN
Mangga calik,
Pun bojo nuju badminton

GENDING
Semah ngaluarkeun rokok tuluy nawaran ka Mang Udin, mang Udin nyokot sabatang, barang arek di sundut rokona, datang semah awewe, dangdosan estu nyari di kabaya.

SEKAR
SEMAH ISTRI 1
Punten mang Udin teu nuju repot
MANG UDIN
Euleuh-euleuh tepang deui pakokolot
SEMAH ISTRI 1
Lawas pisan teu pajonghok
Mang Udin ayeuna montok
MANG UDIN
Aya hibar ngajangkungan
Mung bojo teu kaparaban
SEMAH ISTRI 1
Euleuh ku matak pikahawatoseun
MANG UDIN
Mangga calik, tong ngantos-ngantos opieun

GENDING
Sanggeus sasalaman tuluy ngarobrol, mang Udin rek nyundut rokona tapi teu jadi da kaburu aya nu punten hiji lalaki make pakean ti kampung, bajuna kalotor pinuh ku apu, rokona digolerkeun dina meja

SEKAR
SEMAH LALAKI 2
Punten mang Udin keur aya linggih
MANG UDIN
Euleuh-euleuh geuningan tamu nu tebih
SEMAH LALAKI 2
Najan tebih toh diburu
Ngabonceng kana treuk apu
SEMAH LALAKI 2
Mung hanjakal lengoh pisan
Sumping teh teu cacandakan
SEMAH LALAKI 2
Yaktos maksad mondok rek barempug
MANG UDIN
Mangga calik
Keur mondok sayogi tajug

GENDING
Si Semah tuluy sasalaman ka sakabeh semah nu aya didinya, memeh diuk ninggali roko ngagoler dina meja tuluy dicokot. Mang Udin rumpu rampa neangan roko, kakara ge rek gek diuk, kadenge aya sora nu punten, hiji wanoja, dangdanan kaayeunakeun nu kaasup model

SEKAR
SEMAH ISTRI 2
Punten mang Udin teu nuju bingbang
MANG UDIN
Euleuh-euleuh asa-asa tacan tepang
SEMAH ISTRI 2
Kapungkur mah weureu seubeuh
Sasarengan ical galeuh
MANG UDIN
Aeh yaktos tos sahate
Saperjuangan di pakgade
SEMAH ISTRI 2
Muhun harita urang berjuang
MANG UDIN
Mangga calik
Bari tong ngobrolkeun hutang

BACKSOUND
Marengan paripolah Mang Udin
Mang Udin kasemahan
Tapi teu disuguhan
Teu nyampak kadaharan
Kantongna lepet pisan, Hey!

Mang Udin gupuy gapay
Eusi saku dipapay
Gawena ngusap raray
Bari sakapeung heuay, Hey!

Mang Udin henteu ngomong
Los ka dapur nyolongkrong
Tekona geuning kosong
Dibalangkeun ka kolog, Hey!

Mang Udin geus muringgis
Ninggal semah jejebris
Mamandapan aringgis
Pidato melas melis, Hey

SEKAR
MANG UDIN
Ibu-ibu, bapa-bapa, para tamu anu mulya
Atas nami kulawarga, jisim kuring rek tamada
Ngumpul ngariung saluyu
Amprok pajonghok sakokoh
Sempal guyon gogonjakan
Hanjakal teu disuguhan

RAMPAK SEMAH
Sawios da tos cekap
Ku ngobrol oge hilap

MANG UDIN
Neda agung cukup lumur, pun bojo teh tadi kabur
Henteu ngantunkeun tuangeun
Henteu nyesakeun leueuteun
Rek balanja cupu capa
Kantong ge meneran hapa

RAMPAK SEMAH
Da puguh sarwa awis
Peryogi ekonomis

SEMAH ISTRI 1
Abdi oge bosen sabar
Hayang imah teu kapeser
Sapuluh taun tos ngontrak
Nyicil Perumnas teu kabedag
Ekonomi langkung ripuh
Raweuy hutang, reuay anak

RAMPAK SEMAH
Da puguh sarwa mahal
Tong miharep nu teu halal

SEMAH LALAKI 2
Pun anak lulus SMA
Rek kuliah taya biaya
Nyiar gawe hararese
Lugah-ligeuh unggal poe
Anak hayang jadi presiden
Akhirna jadi tukang ngamen

BACK SOUND
Mang Udin asa enya
Loba batur sasama
Pada nyandang tunggara
Ngabanding kantong hapa, Hey!

Mang Udin helok pisan
Rasana kaubaran
Pidato dihaminan
Ni’mat ungut-unggutan, Hey

GENDING
Ngarasa sanasib, ayeuna mah ngarobrol teh teu kararagok, make tepak toel sagala. Keur guntreng ngobrol, datang semah budak awewe bari mawa tanggeuyan, eusina idangan/berekat

SEKAR
BUDAK AWEWE
Punten Bapa teh keur aya linggih
MANG UDIN
Aeh Nyai ti mana saha kakasih
BUDAK AWEWE
Wasta abdi teh pun Nani
Kadieu nyumponan pancen
MANG UDIN
Pancen naon?, pancen saha?
Jigana jeung barang bawa
BUDAK AWEWE
Yaktos nyanggakeun ieu berekat
Lakadalah urang bakal dahar ni’mat
MANG UDIN
Ieu teh leres keur bapa?
Leres bapa nu diseja
Saurkeun atuh, nuhun pisan
BUDAK AWEWE
Permios rek teterasan

RAMPAK SEMAH
Untung urang can pan pamit
Beuteung lapar nyelengit
Rijki datang ti langit
Rijki teu make duit, Hey!

Rijki datang sorangan
Tah buktina idangan
Rijki teu kamodalan
Henteu kudu nyambungan, Hey!

Najan beuteung geus lapar
Henteu weleh ihtiar
Hadiah keur nu sabar
Akhirna bias dahat, Hey!

MANG UDIN
Ieu berekat urang recah
Sing walatra lir sidekah
Geura antri hiji-hiji
Nampa sidekah sing tarapti

Goreng tempena keur Nyai
Sambel gorengna keur ayi
Lauk gepuk jeung endogna
Ieu mah hancengan Bapa

RAMPAK SEMAH
Heuheuheuheuheuydeuh
Sakedap netra seubeuh

MANG UDIN
Urang terus ngabagikeun
Ieu berekat dibeakeun
Goreng tahuna keur nyai
Acar bontengna keur ayi
Sangu bear rada kotor
Beas raskin, ra’yat miskin

GENDING
Semah jeung pribumi balakecrakan murak berekat, keur jongjon balakecrakan jol budak awewe nu ngrim berekat tea, tuluy ngomong bari rada asa-asa

SEKAR
BUDAK AWEWE
Punten Bapa teh aya di bumi
MANG UDIN
Euleuh euleuh boa arek ngirim deui
BUDAK AWEWE
Mugi bapa wening ati
Berekat kabantun deui
MANG UDIN
Naha kitu? Tanpa hormat?
BUDAK AWEWE
Berekat lepat alamat
MANG UDIN
Aduh mangkaning enggeus direcah
BUDAK AWEWE
Paneneda mugi Bapa sadrah manah
Cek pun biang mani keukeuh berekat kabantun weuteuh
Mun berekat tos dipurak
Gentosna salawerebu perak
MANG UDIN
Euleuh kumaha pendapat siding
RAMPAK SEMAH
Kita ganti biar tidak punya utang
MANG UDIN
Limarebu ti saurang
Dibayar geus tutup bulan
Itung itung miceun sial
RAMPAK
BEREKAT KATITIH MAHAL

Megabrata 74
16 Desember 1988

Catetan
Rumpaka, peran/tokoh diluyukeun kana situasi sareng kondisi

RUMAJA RUMAJA

( Naskah Sekar & Gending : NANO. S )

GENDING
Sekelompok Remaja berkumpul di suatu tempat, mereka terbagi dalam kelompok wanita dan pria. Jarak mereka tidak terlalu jauh, sehingga kesan pandang memandang dapat leluasa diantara mereka

1. WANITA
Hay, hay tapi er-er, Hay hay tapi er-er
Aeh…. Ongkoh hayang tapi era

Sono nyongsrong jero dada
Tapi teu aya kawani kalah ka loba gayana
Tapina euweuh buktina
Aeh…. Ongkoh hayang tapi era

2. LAKI-LAKI
Kukak kokok kukak kokok..kok
Keur kongkorongok
Dulak dilak dulak dilak
Duh hate mah nyeblak
Gular gilir gular gilir
Duh beurat ka gigir
Cir gobang gocir
Hayang kataksir

GENDING
Wanita itu mengerti apa yang menjadi isi hati para pemuda, kemudian dengan nyanyian dia ungkapkan hal ihwal cinta

3. WANITA
WANITA (AS)
Cinta lir ibarat kalangkang
Deukeut anggang bias diteang ku urang
Cinta bisa ilang jeung nembongan
Repok jodo akhirna dating sorangan

RS WANITA
Aduh aduh cinta, aduh aduh cinta
AS WANITA
Cinta manjangkeun carita
RS WANITA
Aduh aduh cinta, aduh aduh cinta
AS WANITA
Cinta panjang lalakona

Salah seorang dari kelompok laki-laki merespon apa yang dinyanyikan si wanita, kemudian iapun memberikan pandangannya pula tentang cinta

4. LAKI-LAKI (AS)
Cinta lir ibarat nu geulis
Gerah endah tinawur sewu mamanis
Cinta perlu jalan anu luwes
Sologoto kapakan diancan putus

RS LAKI LAKI
Aduh aduh cinta, aduh aduh cinta
AS LAKI LAKI
Cinta perlu pangorbanan
RS LAKI LAKI
Aduh aduh cinta, aduh aduh cinta
RS LAKI LAKI
Cinta perlu kasadaran

GENDING
Kini wanita itu tersenyum, sebaliknya laki-laki berpikir untuk menarik simpatinya., untuk itu ada seorang laki-laki yang dijadikan bahan olok-olok mereka.

5. LAKI-LAKI
Lamun enya cinta - ta ta ta
Tanya ka jinisna - na na na
Naha make isin - is is is
Is ulah isinan

Lamun arek wakca - ca ca ca
Carita nu hade - de de de
Dedepongan heula
Heu heu heu heu heu heu heuh heuh

Tong isinan, tong borangan
Pek leukeunan masing beunang

Lamun cinta can laksana
Akalan sabisa-bisa
Lamun cinta ditarima
Pakaulan tumpak kuya

Tong isinan, tong borangan
Pek leukeunan, masing beunang

GENDING
Semua laki-laki semakin berani mendekati kelompok wanita, termasuk si laki-laki yang dijadikan bahan olok-olok mereka

6. LAKI-LAKI
Cinta ditarima - ma ma ma
Mawa kueh putu - tu tu tu
Tuluy eleketek - tek tek tek
Tewak lalaunan

Lamun rek nanyaan - an an an
Kudu dinu poek - wek wek wek
Gelehe ngahenen
Heu heu heu heu heu heu heuh heuh

Tong isinan, tong borangan
Pek leukeunan masing beunang

Lamun cinta can laksana
Akalan sabisa-bisa
Lamun cinta ditarima
Pakaulan tumpak kuya

Tong isinan, tong borangan
Pek leukeunan, masing beunang

GENDING
Kedua kelompok remaja itu mulai akrab dan saling melempar pandang dan senyum

SEKAR
7. LAKI-LAKI
Mimitina tina soca – duh aduh aduh aduh
Tumerus eunteupna hate - duh aduh aduh aduh
Utak utek jadi cinta – emh emh
Gandrung micinta dirina

8. WANITA
Saterusna hulang huleng - duh aduh aduh aduh
Mikiran nu dipitineung - duh aduh aduh aduh
Sono nyongsrong hoyong tepang – duh aduh aduh aduh
Hayang panggih jeung manehna

9. LAKI LAKI
Eh… balaka..balaka..balaka…balaka
10. WANITA
Ubarna kudu balaka carana kudu nyarita
11. LAKI LAKI
Eh… balaka..balaka..balaka…balaka
12. WANITA
Cinta mibutuh kawani
Ulah cengeng jeung borangan
Eh… balaka..balaka..balaka…balaka
13. LAKI LAKI
Tembongkeun sifat lalaki
Sebutkeun cinta pertama
14. WANITA
Eh… balaka..balaka..balaka…balaka
15. LAKI LAKI
Urang kudu tahan harga
Jawaban tunggu harita
16. WANITA
Lamun cinta ditarima
17. LAKI LAKI
Pakaulan nyikat gigi
18. WANITA
Mun cinta teu ditarima
Omat ulah cadu mandi
19. LAKI LAKI
Emh…emh..emh

GENDING
Setelah sama-sama akrab maka berpisahlah mereka masing-masing sambil saling membuat perjanjian

Sesuai perjanjian bertemulah para wanita dan para laki-laki, untuk bermalam minggu. Sepasang kekasih bercengkrama di rumahnya.
Bunyi lonceng pukul 22.00

20. WANITA
Kang geura mulih, ieu tos tabuh sapuluh
21. LAKI LAKI
Embohan atuh kapalang dugi kasubuh
22. WANITA
Kang ulah kitu, engke abah osok bendu
23. LAKI LAKI
Mun bendu akang kurungan, terus nyirekem duaan
24. WANITA
Kang anu bageur, punten abdi sanes ngusir
25. LAKI LAKI
Hm..hm..hm..hm.., mun teu ngusir ngiser atuh
26. WANITA
Ey akang ieuh, engke gareuwah ka abah
27. LAKI LAKI
Kalem we ah, abah ge pan anom heula
28. WANITA
Kang…
29. LAKI LAKI
Kah..!
30. WANITA
Sok atuh !
31. LAKI LAKI
Naon?
32. WANITA
Geura mulih
33. LAKI LAKI
Sono keneh
34. WANITA
Akang bageur, akang sayang, akang lucu..geura mulih
35. LAKI LAKI
Euh…waktosna seep

GENDING
Adegan perpisahan anatara kelompok laki-laki dan wanita
36. RAMPAK SEKAR
Bulan cahayaaan nyorot kaburuan
Urang duaan papisah di pakarangan

Wengi katineung pinuh kaendahan
Rema panangan patuyun nyantel kaheman

Reket panto nutupkeun kasono
Semplek imut kareueut nganteur lengkah pamitan
Wilujeng wengi …panutan

Angin peuting dalingding kakangen
Nyandang aweuhan cinta nyanding talining batin
Wilujeng wengi……panutan

Bandung 27 Nopember 1996

SI KABAYAN JEUNG RAJA JIMBUL

NASKAH :
Carita : Wahyu Wibisana
Karawitan: Mang Koko

GENDING
ADEGAN 1
Si Kabayan ungkleuk-ungkleukan dina korsi goyang.
Pamajikanana keur diuk dina babancik bari kekerod. Totopong hideung ngagantung keneh dina panyaweran…..


KABAYAN
Lalagedayan deuh… lalagedayan
E…. Ngeunah pipikiran

AMBU KABAYAN
Nunang naning nuninang nunang nu nanung
KABAYAN
Hirup ukur laladangan, dadagangan

GENDING
KABAYAN
Laladangan deuh … dadagangan
E…. Sila ipis doang

AMBU KABAYAN
Durang darirang, durang durarung…
KABAYAN
Hirup cukup heheotan, ngaheotang

GENDING

KABAYAN
Heheotan deuh… ngaheotan
E…. bagja dararatang

AMBU KABAYAN
Turang taring, turirang turang turarung
KABAYAN
Hirup teh kudu peletan, kinasihan

AMBU KABAYAN
Asihan si kalong hideung
KABAYAN
Lain ngabobodo deungeun
AMBU KABAYAN
Nyambat batara Asmara
KABAYAN
Apan urang keur usaha

RAMPAK
Kopo kondang kopo kondang
Kopo ki leho jeung sereh
Bodo bongan bodo bongan
Bodo ngabobodo maneh

GENDING

KABAYAN
Bodo bongan bodo bongan
Bodo ngabobodo maneh
Ing tering tering tering
Turdo ! Turdo !

KABAYAN
Pong Seuh Tung !
AMBU KABAYAN
Teu baseuh teusing Kabayan, geus garing

KABAYAN
Pong Ring Tung
AMBU KABAYAN
Boa moal matih Kabayan, teu baseuh

KABAYAN
Lain bisi henteu matih
Da matih aya di uing
Pong Ring Tung
Teu ngeunah nembangkeunana

Koek Ch ! Khoek Ch !
Ch ! Ch ! Ch ! Ch !
Pong Seuh Tung !


GENDING
ADEGAN 2
Si Kabayan nyokot bubuy hui tina sakuna ………….
Camuil-camuil di dahar

KABAYAN
Bumitut, bumitut
Matak gede hitu
Euy ! ambeueun batur
Euy ceuk aing seungit

GENDING
Si Kabayan rungah-ringeuh, sarta nempo ka jauhna

KABAYAN
Tuh !, deuleu siah jikan
Rentang rentang anu datang
AMBU KABAYAN
Saha nu datang ?
KABAYAN
Nyao teuing !

GENDING

KABAYAN
Tuh !, deuleu siah jikan
Mawa halu diseukeutan
AMBU KABAYAN
Arek ka saha ?
KABAYAN
Nyao teuing !

GENDING

KABAYAN
Gancang, lengen siah jikan
Tutulak asup ka imah
AMBU KABAYAN
Na aya naon ?
KABAYAN
Nyaho aing !

GENDING

KABAYAN
Lamun engke aing dehem
Sia kudu gancang jebeng !
AMBU KABAYAN
Naha ku naon ?
KABAYAN
Nyaho aing !


GENDING
ADEGAN 3
Gulang-gulang ti jero mula geus mere iberan yen Raja jimbul rek datang…


RS LALAKI
Bungbang ! Bungbang !
Raja Jimbul rek ngalanglang
Anu mulya Raja Jimbul
Sumping ! Sumping !

KABAYAN
Raja Jimbul ! Raja Jimbul !
Jebul ! Jebul !

RS LALAKI
Bungbung ! Bungbung !
Raja Jimbul rek ngalangkung
Anu mulya Raja Jimbul
Rawuh ! Rawuh !

KABAYAN
Raja Jimbul ! Raja Jimbul
Jebul ! Jebul !

GENDING
ADEGAN 4
Dua Gulang-Gulang marawa tumbak daratang ka hareupeun imah Si Kabayan…

GULANG GULANG
Raja Jimbul ka dieu bade ngalangkung
KABAYAN
Nya pek bae, moal ieuh dicaram

GULANG GULANG
Raja Jimbul ka dieu bade ngalanglang
KABAYAN
Nya hol bae, moal dihalang-halang

GENDING
Gulang-Gulang leuluempangan deui. Tuluy nyampeurkeun deui ka Si Kabayan…

GULANG GULANG
Gancang buruan sapuan !
KABAYAN
Biasana oge tara

GULANG GULANG
Enya ayeuna sapuan !
KABAYAN
Biasana oge embung

GULANG GULANG
Enya ayeuna purunkeun
Hayoh ! gancang !
Ayeuna purunkeun

KABAYAN
Purun mah aya di uing
Niat ge uing nu oga
Eunteu ulun eunteu iat
Aduh… ngeunah nguliat…

GENDING
Dina korsi goyangna Si kabayan kukuliatan, bari teu malire
kana parentah gulang-gulang

KABAYAN
Dadagangan, euy ! dadagangan
E …. Sila ipis doang, bagja dararatang
Durang daring durirang durang durarung
Hirup tina laladangan, lalagedayan….

GENDING
ADEGAN 5
Si Kabayan sanggeus ungkleuk-ungkleukan, tuluy sasarean peureum hayam.
Gulang-gulang duanana bengong…
Raja Jimbul datang ka hareupeun imah Si Kabayan….
Gulang-Gulang nu duaan tea gancang acong-acongan nyembah.
Eta Raja teh make pakean nu araraneh (alusna tumpak tandu) …..


RAJA JIMBUL
Alus hayam pelung teh euy !
Anu saha ? Euy !

PATIH
Uteuk tongo walang taga sadaya kagungan gusti
Kitu lain Mantri Jero ?

MANTRI JERO
Sadaya kagungan raja, nu ngereh ieu nagara
Kitu lain gulang-gulang ?

GULANG GULANG
Timbalan ! satimbalan ! Nun !

GENDING
Gulang-Gulang ngepung hayam Si Pelung

KABAYAN
Utek tongo walangtaga Raja Jimbul anu boga
Tapi si Pelung nu si Kabayan
Raja nu ngaraja aing….

GENDING
Raja Jimbul jeung rombongan kaget bari rada undur-unduran

RAJA JIMBUL
Uhu ! Uhu ! jelema naon eta Patih ?

PATIH
Um um um um, jelema naon eta Mantri ?

MANTRI JERO
Ck ck ck ck, jelema naon eta teh, euy ?

GULANG GULANG
Jelema gejul, nun !

MANTRI JERO
Jelema burung, manawi !

PATIH
Jelema eubleu, kulanun !

RAJA JIMBUL
Uhu ! Uhu ! jelema eubleu eta teh, hah !
Paingan ! Ha ha ha .

KABAYAN
Mmmm …..
Bisi aranjeun teu nyaho. ho ho ho ho ho ho ho
Kaula teh hiji wiku hu hu hu hu hu hu

GENDING
Raja Jimbul jeung rombongan silih reret jeung pada baturna

RAJA JIMBUL
Naon cenah, Patih ?

PATIH
Naon cenah, Mantri ?

MANTRI JERO
Naon cenah, euy ?

GULANG GULANG
Sanggemna teh Wiku, nun !

MANTRI JERO
Sanggemna teh Wiku, kulan !

PATIH
Sanggemna mah Wiku, kulanun !

RAJA JIMBUL
Wiku ! Uhu ! Uhu ! Uhu ! Uhu !
Wiku saha ngaranna, hah ?

KABAYAN
Mmmmm………..
Kaula wiku Kabayan
Kabayan Batara nu euweuh
Kabayan Ahaing nu aya

RAJA JIMBUL
Eukeur naon Sang Wiku aya di dieu
KABAYAN
Keur nungguan cupu manik

RAJA JIMBUL
Karah mana nu disebut cupu manik ?
KABAYAN
Apan ieu Bumi Manik

RAJA JIMBUL
Cik terangkeun, aya naon di jerona
KABAYAN
Aja Putri Tunjung Turus

RAJA JIMBUL
Aya saha, Patih ?

PATIH
Aya saha, Mantri ?

MANTRI JERO
Aya saha, cenah ?

GULANG GULANG
Aya putri Tunjungturus, sanggemna.. Nun !

RAJA JIMBUL
Aya putri
KABAYAN
Aya putri Tunjungturus, cekeng

RAJA JIMBUL
Aya putri, uhu, aya putri !
Geuheulis eta putri teh, Wiku ?

KABAYAN
Kumaha nu nenjona, Ibul…
Mun nu nenjona jelema suci..
Eta putri teh geuheulis, Ibul..
Lamun di tenjo ku anak jadah
Eta putri teh goreng patet, Ibul ..

RAJA JIMBUL
Naon Ibul-Ibulan ?

PATIH
Naon Ibul-Ibulan ?

KABAYAN
Ieuh elu, Ibul teh hartina Elu
Mama banget asih ka Elu

RAJA JIMBUL
Naon Elu-Eluan ?

PATIH
Naon Elu-Eluan ?

KABAYAN
Ieuh Elu, Elu teh hartina Jalu
Mama nyaho karesep Jalu
RAJA JIMBUL
Naon Wiku ?
KABAYAN
Karesep Jalu teh ambewe
Kabeneran mama boga
Putri geulis Tunjungturus

RAJA JIMBUL
Uhu, uhu, uhu,……………
Iku, Iku, Iku…
Ari Iku teh Uki
Ari Uki teh ngarti
Ngarti kana kabeuki ngaing
Kabeuki ngaing Ambewe

KABAYAN
Uhu, uhu,uhu
RAJA JIMBUL
Aha, aha, aha
KABAYAN
Ihi, ihi, ihi
RAJA JIMBUL
Heu heu heu heu heuheuheuydeuh

KABAYAN
Heuay……….
Seuri kabeh !, seuri kabeh !, heup, heup,
RAMPAK
Hahahah, hihihih
Huhuhu, heuheu…heuydeuh

KABAYAN
Tah kitu ! Heueuh ! Alus !

KABAYAN
Heuay…….
Heuay kabeh !, heuay kabeh !, heup heup !

RAMPAK
Heuay, heuay, heuay, heuay
RAJA JIMBUL
Hah !

GENDING
ADEGAN 6
Si Kabayan gek diuk deui dina korsi goyang bari ngadahar hui.
Raja Jimbul jiga nu kapengpeongan ku Putri Nyi Tunjungturus. Gawena leuleumpangan bari ret deui ret deui ka Si Kabayan


RAJA JIMBUL
Duh Nyi Putri Tunjungturus
Kunaon salira nyepi
Duh Nyi Putri Tunjungturus
Kunaon salira nyepi

Cik mangga geura kaluar
Ieu Kakang titatadi
Keur ngantos hoyong gok tepang
Sempal guyon sareng nu geulis

KABAYAN
Tok tar, tok tar, nu denok moal kaluar
Cingkuk, cingkuk, lamun teu diciluk-ciluk
Rincik rincang, diciluk-ciluk asihan
Ba, ba,ba..!, ba,ba,ba…!

GENDING
Ngadenge kecap asihan, Raja Jimbul curingkah


RAJA JIMBUL
Asihan, asihan naon Wiku
Bisa ku…

KABAYAN
Asihan si Kalong hideung
Bisa ngemat tineung deungeun
u-ey, u-ey, Lauk euy lauk

GENDING
Raja Jimbul terus ngadongsok ka Si Kabayan

RAJA JIMBUL
Cing atuh, hempek wiku
Sugan ku….

KABAYAN
Kumpulkeun heula nu lenjang
Nyi Putri resepeun tembang

RAJA JIMBUL
Uhu !, Uhu
Parekan ngaing ka dieu !

GENDING
ADEGAN 7
Opat mojang nu jadi parekan Raja daratang ka dinya..

KABAYAN
Ji wa lu pat, uluh-uluh
Hayang newak
Aduh-aduh

PAREKAN
Ey – ey – ey –ey
Ey – ey – ey –ey

KABAYAN
Jaleuleuja, ta’em, ta’em
Hayang boga
Meureun pelem

PAREKAN
Iy – iy – iy – iy
Iy – iy – iy – iy

KABAYAN
Embung ah, embung
Da bongan geuing iy,iyan

RAJA JIMBUL
Tumutkeun ka palay Wiku

GENDING
Sanggeus nyieun semu nu “pundung”, Si Kabayan malik ngadeukeutan deui Parekan

GENDING
KABAYAN
Mun ambewe enggeus purun
Tinggal adu-adu genjreng
Mun ambewe henteu purun
Ulukutek, eleketek
Yeung heup hoy, du adu adu genjreng

Mun lalaki enggeus hayang
Neangan keur adu genjreng
Mun lalaki henteu hayang
Can ngadenge teu hayangna
Yeung heup hoy, du adu genjreng

RS LALAKI
Heuy, du adu genjreng ! Heuy du adu genjreng !
Heuy, du adu genjreng !

KABAYAN
Jep!, Jep ! tadi oge…
Mun ambewe henteu purun, ulukutek eleketek
Mun Nyi Putri teu puruneun, ulukutek-eleketek

RS LALAKI
Horseh ! Horseh ! Diele-eleketek
Diele-eleketek, sina tepi ka daek

KABAYAN
Cik prak, geura pek ! Cing prek geura pek !
RAJA JIMBUL
Duh Nyi Putri Tunjung Turus


GENDING
ADEGAN 8
Si Kabayan bari tutunjuk

KABAYAN:
Yap, kadieu, kadieu…
Bul !, Tih !, Tri !, mBewe diditu

GENDING
Parekan parindah diukna bari “gengsor”

KABAYAN
Naon cik tah ?
RAJA JIMBUL
Naon ta teh ?

KABAYAN
Asihan si Kalong hideung
Bisa ngemat tineung deungeun
Hayang meunangkeun saha, Bul !

RAJA JIMBUL
Hayang ngawin nya Putri Tunjung Turus

KABAYAN
Hayang naon, Tih ?
RAJA JIMBUL
Sia mah montong rek hayang keur ngaing !

KABAYAN
Hayang naon, Tri ?
PATIH
Sia mah montong rek hayang keur ngaing

KABAYAN
Heueuh !, Heueuh !
Kabeh oge papada boga kahayang
Tong parasea, gek !, gek !, dariuk

GENDING
Si Kabayan rada nyege hareupeun Raja Jimbul. Teu lilaraja katembong mengkek irungna. Ret ka Patih. Patih nunjuk kana bujur Si Kabayan. Tiluanana nu aya ditukangeun Si kabayan marengkek irung…

KABAYAN
Batara Asmara geus lungsur, deuleu !
Salirana seungit lir kastori
Kaambeu, Putu ?

RS LALAKI
Uhu, uhu, uhu,uhu, Oho, oho, oho, uuuuu…..

KABAYAN
Upama kaambeu bau biuk, deuleu
Maksud anjeun pasti moal hasil
Lamun seungit pasti hasil
Kaambeuna seungit ?

RS LALAKI
Seungiiiii … t !!!

KABAYAN
Heueuh, tapi Mama rek motoy heula !, Daragoan..!

GENDING
ADEGAN 9
Si Kabayan bari nyekelan beuteungna, lumpat gagancangan indit ti dinya
Sabot Si Kabayan euweuh Raja Jimbul nembongkeun kakawasaanana (sabada tumpa tempo jeung luak-lieuk

RAJA JIMBUL:
Hoey !, Hoeyah !, Lakadalah
Nyingkah !, Nyingkah kabeh lalaki !
Iwal kami, hihi… heuy
Hoey !, Hoeyah !, Lakadalah
Cicing ! Cicing kabeh Awewe
Reujeung kami, heheheh…..

GENDING
Patih, Mantri, Gulang-gulang arindit ti dinya. Tinggal Raja jeung parekan

RAJA JIMBUL
Uhu !, uhu ! Nguseup lauk make eupan
Susuganan bae beunang
Nguseupan bikang ku bikang

Uhu !, Uhu ! Henteu kudu make bingung
Henteu kudu menta tulung
Ka Wiku nu rada burung

GENDING
Si Kabayan ngadehem tarik pisan, Raja Jimbul ngagebeg. Sanggeus kanyahoan euweuh, tuluy nyalukan Parekan…Haharewosan….

RAJA JIMBUL
Kadieu !, kadieu !
Nyi Putri anu keur nyepi, teu beunang disisikudi
Supaya gancang kaluar, calukan ku sarerea !

PAREKAN
Unjuk sumangga

GENDING

RS PAREKAN
Gusti Putri, Gusti Putri…
Mangga enggal geura gugah
Diantosan ku nu gagah

RAJA JIMBUL
Ieu kakang anu gagah
Gagah !, Gagah !, Raja Jimbul

PAREKAN
Gusti Putri, Gusti Putri
Ieu panto enggal buka
Anu kasep geura papag

RAJA JIMBUL
Ieu kakang anu kasep
Kasep !, Kasep ! Raja Jimbul

PAREKAN
Gusti Putri, Gusti Putri
Masing emut ka salira,
Mangga urang ka nagara

RAJA JIMBUL
Ka Nagara reujeung kakang
Gagah !, Kasep !, Raja Jimbul

GENDING
ADEGAN 10
Sanggeus euweuh walonan ti jero, Raja Jimbul miwarang ku peta, supaya Parekan leuwih ngangseg kana panto imah Si Kabayan. Parekan tingtarempo, sawareh aya nu ngetrokan panto imah…..

PAREKAN:
Trok trok trok trok. Trok trok trok trok
Diketrok-ketrok ti luar, diketrok ketrok ti luar
Nu dilebet sing kaluar

Trok trok trok trok. Trok trok trok trok
Diketrok ketrok geura bray,
Diketrok-ketrok geura bray
Nu dilebet geura lugay

GENDING
Si Kabayan mucunghul tina hateup, ngilikan kaayaan di buruan….
Gancang ngalelep deui sakeudeung… Pucunghul deui bari geus dikurubung ku lawon bodas, kawas nu dimukena…

PAREKAN
Trok trok trok trok. Trok trok trok trok
KABAYAN
Oho !, Oho, Oho !, Oho ! Hoh Hoh.. Uhuuu

GENDING
Kabeh nu diburuan rareuwaseun, malah rek lalumpatan.
Tapi kaburu dicaram ku Si Kabayan

KABAYAN
Montong sieun ! Montong Sieun !
Nya kami anu ngageugeuh patempatan ni didieu
Nya kami anu ngajaga salirana Nyai Putri
Aya naon maraneh keketrok, Hah !

GENDING
Raja Jimbul mani nyempod-nyempod bae awahing ku sieun…
Gancang mere isarah supaya Parekan ngawalonan

PAREKAN
Nun, Embah.. mugi masihan pituduh
Supados eta Nyi Putri enggal lungsur ti kaputren

KABAYAN
Titah saha, hah !
Saha ?, Saha nu boga kahayang, Hah !

PAREKAN
Piwarang dunungan kuring,
Anu gagah anu kasep, Raja Jimbul

KABAYAN
Mana Incu embah..eu…Ibuul ?
RAJA JIMBUL
Sumun,.. sumun.. ieu.. ieu..
Ieu putu Embah.. kulanun

KABAYAN
Incu teh hayang ka Putri eu..eu.. Incu
RAJA JIMBUL
Teu pindo pariksa .. eu.. Sumun.. Embah…

KABAYAN
Hade !, Hade eu..Incu
Nurub cupu saperti tongo jeung kutu
Ongkoh cek Dewa Asmara
Nitih wanci da memang enggeus jodona
Tapi

RAJA JIMBUL
Nanging naon, Embah ?
Kabayan
Kudu aya pameulina
Nya muja si kalong hideung
Nu aya di panyaweran
Memehna mangkade pisan
Ulah make baju alus
Kudu gancang dicuculan

Raja jimbul
Sumangga, mangga, Embah
Mareungpeun kabeh sing rekep
Maralik kabeh kaditu
Kapalay Dewa Asmara
Kami arek cucul-cucul
GENDING
ADEGAN 11
Parekan mareungpeun, maralik nukangan Raja Jimbul
Raja Jimbul cucul-cucul, tinggal calana, jero

KABAYAN:
Alungkeun kabeh ka kami,
Kabeh..eu… Incu !..

GENDING
Raja Jimbul ngalung-ngalungkeun pakeanana
Ku Si kabayan disanggapan

KABAYAN:
Depa, Incu, deukeutan Si kalonghideung
Depa ! Depa bari ngagayem

GENDING
Raja Jimbul sila mando hareupeun totopong nu ngagantung tea.. bari ngagayem..

KABAYAN
Anu sejen kudu diuk di tukangna
Eu… diuk ! Diuk ! nunjuk ka hareup

GENDING
Raja Jimbul kapaksa marentah ku isarat, sangkan Parekan dariuk tukangeunana bari nunjuk kana tonggong Raja Jimbul nu geus buligir….

KABAYAN
Apalkeun jangjawokanana
Kieu..apalkeun
Pong seuh tung, pong seuh tung
Jajado, jajado
Cek Incu…
Hoyah !, Hoyah !
Cek nu sejenna, Pok !

RAJA JIMBUL
Pong seuh tung, pong seuh tung
Jajado, jajado
PAREKAN
Hoyah !, Hoyah !, Hoyah !, Hoyah !
KABAYAN
Ing ter ing ter ing ter ing
Alus ! Heueuh ! Sakali deui Incu

RAJA JIMBUL
Pong seuh tung, pong seuh tung
Jajado, jajado
PAREKAN
Hoyah !, Hoyah !, Hoyah !, Hoyah !
KABAYAN
Ing ter ing ter ing ter ing

Ayeuna, iwal Incu
Kudu indit kabeh jauh ti kaputren
Geus kitu ku sorangan
Buru-buru Incu ngetrokan kaputren

GENDING
ADEGAN 12
Parekan arindit gagancangan. Raja Jimbul culang-cileung sorangan.
Bari asa-asa ngadeukeutan panto. Sajeroning kitu Si Kabayan ngalelep tuluy dangdan make pakean raja
Raja Jimbul keketrok. Bray panto muka, lol Ambu Kabayan ngulang-ngulang halu rek diteunggeulkeun ka Raja Jimbul. Raja Jimbul reuwas tuluy lumpat.
Ambu Kabayan ngudag … teu kebat.. key seuri bari nunjuk ka lebah Raja Jimbul.. Si kabayan kaluar imah geus make pakean Raja Jimbul

KABAYAN
Heuheuy, heuheuy
Uing jadi kasep
Uing jadi Raja, deuleu !

Heuheuy, heuheuy
Maneh ka nagari
Maneh prameswari, daek ?

KABAYAN/AMBU KABAYAN
Raja cek urang
Prameswari cek urang
Urang mah kumaha urang
Lain ? Heuy !

Raja Jimbul enggeus mabur
Jiga kuda kabur, hiem, hiem
Hayu urang seuri, nyikikik, hi hi hi
Hayu hurang seuri, nyakakak, ha ha ha

Heuheuy deudeuh
Heuheuy deudeuh
Hirup mah heuheuy jeung deudeuh,
Heuheuy jeung deudeuh
Sukaseuri nya urang nu lalajona
Hoyah ! Hoyah !
Urang ge dilalajoan
Geus ah ! Geus ah !

Bandung, 12 Februari 2002
Disalin tina Naskah aslina
nu disusun dina tahun 1965