GUNEM (SEKAR) CATUR

1
Hoyah, Engkang mulih ti mana? - leuh mani reuwas
Geuning sumping sakieu elatna - tas rapat di kantor
Euleuh, panganggo kalotor - ah henteu sing
Sareng seungit minyak - nyarita teh gampang wae

Ieuh naha Nyai teu nyaho? - naon deui, naon?
Kapan Engkang ngomong bareto - kumaha deui cenah
Engkang jeung sabatur-batur - waaah
Di kantor sok rapat jeung mindeng melembur - bohong lah alesan

+ Geuning tadi di kantor bet suwung
- Dines luar meninjau ka kampung-kampung
+ Deuh bohong, di kampung Engkang ka duyung
- Lain kaduyung ku gelung, et amah latihan nyandung

2
Ieuh Engkang gajih samporet - kahareup mah ditambah
Rumah tangga mani geus rajet - biasa kaum buruh mah
Kapan tambah gajih kabeh - acan
Naha gajih Engkang bet sakieu keneh - can naek gajih akang mah

Ieuh Nyai karek rencana - rencana-rencana
Bakal tambah gajih sarerea - tibareto padahal
Tapi di kantor Akang mah - kumaha
Gajihna pagawe can ditambah-tambah - bohong lah alesan

+ Rerencangan nyanggemkeun tos beres
- Propokasi, supaya Engkang di gebes
+ Lah bohong, tambah gajih kadieukeun
- Terus terang geus katampa, ngan bae dipahugikeun

3
Ieuh engkang urang pakaulan - pakaulan naon deui
Lamun pareng panen lekasan - rek kumaha cing
Urang ngayakeun hiburan - ituh
Bari suka seuri leuh balakecrakan - emh, pohara…

Ieuh Nyai kudu wayahna - biasa ari geus kitu teh
Nyaah duit pake teu guna - kapan bari nganjuk deui
Waktu pikeun reuah-reuah - dikumahakeun
Anggur digunakeun keur ngagarap sawah - bosen, lah, bosen

+ Tas panen suka ria sing jongjong
- Ulah poho urang kabeungkeut ku ijon
+ laah kajeun, ijon perlu, nongton daek
- Sasalad ijon mahabu, beas ge hargana naek

4
Ieuh Engkang ulah achterlyk - kudu kumaha atuh
Meungpeung Engkang mashur jeung hawek - memang luhur pangkat mah
Batur tumpak mobil sedan - ari urang ?
Abdi oge hoyong leuh lalagedayan - cetek geuning

Aduh Nyai mangga teh teuing - tah kedah kitu
Asal Nyai ulah rek pusing - nuhun lah nuhun
Kapan Engkang pangkat luhur - kantenan we
Mawa mobil kantor leuh nurutan batur - pahlawan mah kedah kitu

+ Tandaning cinta nurut ka abdi
- Jiwa raga banda Engkang anu Nyai
+ Duh Engkang, abdi hoyong seueur rijki
- Engkang mah nurut ka Nyai, kapaksa Engkang korupsi

5
Ieuh Nyai duit satumpuk - euleuh, mani digepokan
Hasil susah payah saisuk - artos ti mana eta teh
Duit nu kantor kapalang - artos kantor
Terus dirukal-rikel jadi nu Engkang - lucu, lah lucu

Ieuh Engkang eta pamali - pamali, paman diali
Kajeun gajih Engkang teu mahi - kapan kamari menta bukti
Najan panggaleukeun sipon - ari kitu
Mun hasil korupsi duh, sieun kabendon - pamali, kabendon..

+ Kapan nu jujur temahna ancur
- Eta bohong! Nu jujur cahyana mancur
+ Ieuh, Nyai, cahya mancur, kantong kosong
- Kajeun kantongna nu kosong, sok dapon jasana tembong

6
Lamun Engkang sarapan pagi - rek dibere naon cing
Poma ulah arek kumaki - sasari ge tara jeung kiju mantega
Mending tuang kulub hui - ituh
Gegentos nasi goreng atawa roti - Aduh, cilaka

Najan beak hui sabaskom - lir anu mamayu
Keukeuh rasa beuteung teu cumpon - lah ku rohaka
Lamun tacan manggih sangu - beuteung karet panginten
Beuteung nagih eusi lir anu mamayu - sedep tuang ieu mah

+ Kumaha beas pareng paceklik
- Tong salempang, urang ngadagoan milik
+ Deuh Engkang, palawija langkung mirah
- Mun beas hese kabeuli, peuyeum jeung hui ge ngeunah

7
Ieuh Engkang abdi teh ngulik - uluh, ngulik naon
Ngatur biwir hayang dilipstik - uluh, naon deui
Ngulik halis sina jekrem - sieup lah
Beungeut, irung jeung pipi dibalur ku krem -ningkat pisan ieu mah

Euleuh atuh gagah jeung maher - abdi jadi geulis pisan
Nyai bakal siga pilemster - aduh nuhun pisan
Halis make harangasu - waah
Wedakna bangkuang jeung biwir ku gincu - alim ah pait

+ Hoyong tumpak sedan bari meta
- Entong waka, moal tepi, mending Beca
+ laah Engkang, hoyong jengki jeung yukensi
- Tong waka jengki yukensi, beas ge henteu kabeuli

8
Ieuh lamun abdi keur ngawih - rek kumaha deui cing
Omat Engkang ulah ngerewih - ti tadi ge balem da
Anggur bandungan taliti - puguh we
Minangka ngajenan ka tukang seni - kawas can ngarti wae

Ieuh Nyai kapan biasa - biasa kumaha deui
Taya ajen ka nu keur ngora - na lalawora teuing
Najan Pasinden nu maher - ari kitu
Mun teu maen mata leuh kateler-teler - sok nyeri panon lah

+ Seni sora nyanding seni mata
- Mun geus kitu, Pasinden mindeng dipuja
+ Deuh sanggem, bade ngaggo gaya bebas
- Harga Nyai bakal ningkat, nerekel jeg harga beas

9
Euleuh Engkang geuning raehan - naha naon deui kitu
Ngadak-ngadak eta kumisan - euleuh, kana kumis
Kumis keur pondok teh carang - tapi sieup
Mun ditilik-tilik eyy siga barangbang - alah, geura urang balikkeun

Etah Nyai geuning ku langsing - kapan niru pilmster
Angkeng lenggik siga papanting - sapertos putri panginten
Tapi ambekan kapegung - naha?
Sabab cangkeng dibeulit make bebengkung - Step in..kituh

+ Naha Engkang bet geuning poyokan
- Bongan tadi Nyai nu ngamimitian
+ Deuh Engkang, mugi tong kateterasanPiraku teu ngahapunten, hariring tamba lumayan

KA TEU AMANAN HATE

1
- Ari Bapa tos uninga, naon pangna hate teu aman?
+ Terang pisan, sabab loba kasieun
- Sieun dorhos duruk imah, geuning jeung kagarongan
+ Bapa mah sieun nu nagih
- Abdi mah sieun teu ngarih
+ Bapa mah sieun huisan
- Iiiih, sieun ondangan
+ Hoyah geuning borangan
- Kapan hate teu aman
+ Bapa oge
- Abdi oge
x Papada loba kasieun

PELOG
- Sieun teu mulya, sieun hirup sangsara
+ Sieun bojo goreng patut
- Sieun salaki teu matut
+ Eeeeeh, geuning poyokan
- Bongan nyarekan
+ Lain nyarek
- Lain moyok
x Perbawa hate teu aman

2
- Ari Bapa tos uninga, naon pangna hate aman?
+ Terang pisan, sabab loba kahayang
- Hayang beunghar hayang ginding, (geuning) kaleuleuwihi
+ Hayang dirungrum ku mojang

- Abdi ge hoyong “prey omhang”
+ Bapa hayang meunang lotre
- Iiiih, hayang BMW
+ Hoyah geuning sarakah
- Eyyy, Bapa ge ningkah
+ Bapa mah
- Abdi oge
x Ngan ukur semet kahayang

PELOG
- Hayang dipuji, hayang didama-dama
+ Nyai kudu loba jasa
- Kapan cekap ku carita
+ Laaaaaah eta mah sombong
- Bapa ge bohong
+ Nyai sombong
- Bapa bohong
x Ulah rek patorong-torong

3
- Ari Bapa tos uninga, naon pangna hate aman?
+ Terang pisan, sabab loba kanyaah
- Nyaah kana kadudukan, teu bisa sok dilakonan
+ Bapa nyaah kanu jilat
- Da Bapa resep dihormat
+ Bapa nyaah kanu lenjang
- Iiiih, mata karanjang
+ Hoyah kateterusan
- Bongan Bapa elodan
+ Bapa nyaah
- Abdi oge
x Papada teu aman hate

PELOG
- Nyaah ka wedak, mun hujan dikarimbun
+ Bapa nyaah kanu serong
- Tangtos Bapa kongkalikong
+ Laaaaaah, ka bojo nyaah
- Aya pangarah
+ Nyai kejem
- Bapa oge
x Papada resep dialem

4
- Ari Bapa tos uninga, naon pangna hate aman?
+ Terang pisan, sabab loba kaembung
- Embung hirup sederhana, kapaksa jalan teu jujur
+ Bapa mah embung kaduyung
- Abdi mah embung dicandung
+ Bapa embung hese cape
- Iiiih, embung digawe
+ Eyy, bet pangedulan
- Hoyang bet teu ceehan
+ Lain ngedul
- Sanes melid
x Papada loba ka embung

PELOG
- Embung latihan, tapi hayang pujian
+ Bapa mah embung nyambungan
- Entong ngarepkeun idangan
+ Eeeeeh, Nyai ku rewel
- Bapa ge bawel
+ Nyai ngedul
- Bapa melid
x Nimbulkeun kateuamanan…..

MIKANGEN TENGTREM

1
+ Yu ka landeuh
- Ah embung bongan loba careuh
+ Atuh hayu ka lamping
- Ah embung sieun tanduk munding
+ Coba hayu ka landeuh
- Asal bari dahar seubeuh
+ Geura hayu ka lamping
- Asal nyanding eusi piring

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ kadieu ngadeudeukeut bari nyampeur pangjeujeuh

Anggana Sekar:
Ka landeuh abdi ngeureuyeuh, sok dapon nganteur beubeureuh
Ka lamping abdi rek ngiring, sok dapon nyanding nu ginding

Rampak Sekar :
Seuyang-seuyang, disawang lewang haringhang, bangreung bingbang
Beunang-beunang, narawangan katon siang, alam padang

2
+ Yu ka landeuh
- Ah inggis panggih jeung beubeureuh
+ Atuh hayu ka lamping
- Ah inggis panggih jeung nu ginding
+ Coba hayu ka landeuh
- Dapon hirup reugreug pageuh
+ Geura hayu ka lamping
- Dapon hate henteu rungsing

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ kadieu ngadeudeukeut bari nyampeur pangjeujeuh

Anggana Sekar
Ka landeuh abdi sok kanceuh, dipeuseuh kunu ngageugeuh
Ka lamping abdi sok gering, dirungsing beurang jeung peuting

Rampak Sekar
Seuyang-seuyang, disawang lewang haringhang,
bangreung bingbang
Beunang-beunang, narawangan katon siang, alam padang

3
+ Yu ka lembur
- Ah sok tagiwur dinu singkur
+ Atauh hayu ka kampung
- Ah sieun lisung nu bangkewung
+ Coba hayu ka lembur
- Asal campur jeung nu mashur
+ Geura hayu ka kampung
- Asal ngindung ka pangagung

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ kadieu ngadeudeukeut bari nyampeur pangjeujeuh

Anggana Sekar :
Ka lembur abdi sok paur, ku bahya ditutur-tutur
Ka kampung abdi sok bingung, kareueung inggis kapahung

Rampak Sekar
Seuyang-seuyang, disawang lewang haringhang, bangreung bingbang
Beunang-beunang, narawangan katon siang, alam padang

4
+ Yu ka kebon
- Ah sok kalebon ku kakayon
+ Atuh hayu ka sawah
- Ah inggis payah loba lentah
+ Coba hayu ka kebon
- Asal ngadon ngaso jongjon
+ Geura hayu ka sawah
- Asal murah dahar ngeunah

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ kadieu ngadeudeukeut bari nyampeur pangjeujeuh

Anggana Sekar
Ka kebon abdi teu jongjon, kaganggu ceuli jeung panon
Ka sawah abdi teu betah, da bongan sok digadabah

Rampak Sekar
Seuyang-seuyang, disawang lewang haringhang, bangreung bingbang
Beunang-beunang, narawangan katon siang, alam padang

5
+ Yu ka leuweung
- Ah osok keueung, cuang cieung
+ Atuh hayu ka reuma
- Ah loba bahya tinu bala
+ Coba hayu ka leuweung
- Asal ngeunteung kanu ludeung
+ Geura hayu ka reuma
- Asal ngajak nu bumela

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ Kadieu ngadeudeukeut bari nyampeur pangjeujeuh

Anggana Sekar
Ka leuweung abdi teu ludeung, pajeueung jeung bahya beuheung
Ka reuma sok ngarasula, kacipta bahya tumiba

Rampak Sekar
Seuyang-seuyang, disawang lewang haringhang, bangreung bingbang
Beunang-beunang, narawangan katon siang, alam padang

6
+ Yu ka kampung
- Ah embung jauh ka pangagung
+ Atuh hayu ka dayeuh
- Ah embung, meuweuh nu talingeuh
+ Coba hayu ka kampung
- Asal mendung make payung
+ Geura hayu ka dayeuh
- Asal reureuh dahar seubeuh

- Kaditu milu untung (samiuk sagulung)
+ Kaditu buru-buru milu aub, kaaku
- Kadieu weureu seubeuh
+ kadieu ngadeudeukeut bari nyampeur pangjeujeuh

Anggana Sekar
Ka kampung abdi kaduhung, ka duyung kunu dicindung
Ka dayeuh abdi sok kanceuh, kapeupeuh nu sawan-geureuh

Rampak Sekar
Seuyang-seuyang, disawang lewang haringhang, bangreung bingbang
Beunang-beunang, narawangan katon siang, alam padang

Bandung, 19 April 1961

PATELAK SWARA

1
ISTRI : Ayeuna mah abdi resep kakawihan
PAMEGET : Sora nyai halimpu
ISTRI : Kapan ngawih ngabaku
PAMEGET : Bener, sing mayeng latihan
ISTRI : Hoyong ka RRI
PAMEGET : Tong waka kataji
ISTRI : Pan gaduh ajen
PAMEGET : Tacan katangen
ISTRI : Ieuh abdi pasinden

PAMEGET : Hanjakalna Nyai mundur di sakola
ISTRI : Kapan ku seni
PAMEGET : Teu bisa jadi
ISTRI : Seni nimbulkeun gogoda
PAMEGET : Lain pedah seni
ISTRI : Tos karuhan seni
PAMEGET : Di sakola nyai mundur sabab ngedul
ISTRI : Ey,ey sombong
PAMEGET : Ey,ey bohong
Lain seni matak bodo, eta mah uteukna mintul

ISTRI : Abdi sadar gaduh bakat kana seni
PAMEGET : Tuh geuning kumaha sakola teu maju
ISTRI : Eta mah tuna pangarti
PAMEGET : Pan keukeuh pajarkeun seni teh ngaganggu
ISTRI : Anggapan kurang pariksa
PAMEGET : Sakola mundur
ISTRI : Seni teu jujur
PAMEGET : Hirup taya pangabisa

2
ISTRI : Lumah lameh tara-tara ti sasari
PAMEGET : Kapan kaka kataji
ISTRI : Da abdi mah teu sudi
PAMEGET : Geuning tadi ngajak seuri
ISTRI : Seuri tanpa harti
PAMEGET : Seuri nu birahi
ISTRI : Salah dugaan
PAMEGET : Kaka teu hamham
ISTRI : Geuning ambon sorangan

PAMEGET : Saenyana kaka teh maksud lalajo
ISTRI : Naha henteu jung?
PAMEGET : Kapan kaduyung
ISTRI : Abdi mah teu mikat jodo
PAMEGET : Naha ngajak imut?
ISTRI : Da sanes pangirut
PAMEGET : Rek lumaku kaganggu ku imut manis
ISTRI : Ey-ey, ambon
PAMEGET : Ey,ey, panon
Pura-pura tidak mau, giler matana romantis

ISTRI : Aduh kaka geuning bendu jeung nyeukseukan
PAMEGET : Piraku teu kitu da bongan ditampik
ISTRI : Abdi mah seuri hormateun
PAMEGET : Hormatan kumaha, kunaon teu telik
ISTRI : Abdi silo lepat pandang
PAMEGET : Lepat kumaha?
ISTRI : Kinten satria
Sihoreng mata keranjang
3
ISTRI : Damel naon siga nu kenging tunggara?
PAMEGET : Eukeur ngulik pulitik
ISTRI : Eta soca buncelik!
PAMEGET : Sangkan kapetik hasilna
ISTRI : Kuma mun geus hasil?
PAMEGET : Nagri mamur adil
ISTRI : Kumaha kaka?
PAMEGET : Kaka berjasa
Euleuh kasinugrahan

PAMEGET : Nyai kudu mulang ka kapribadian
ISTRI : Pan ieu oge
PAMEGET : Mulangna hese
ISTRI : Abdi teu kabarat-baratan
PAMEGET : Geuning bareto mah
ISTRI : Abdi mah teu robah
PAMEGET : Laku lampah internasional ditiru
ISTRI : Ey,ey, henteu
PAMEGET : Ey,ey, enya
Embung disamping kabaya, ngawih ge lagu “ I love you”

ISTRI : Abdi sadar henteu kedah dikukuprak
PAMEGET : Na naon cirina tandana geus sadar?
ISTRI : Gotong royong ti bubudak
PAMEGET : Geuningan mun ngawih kadenge sok ingkar
ISTRI : Laras mah pelog-salendro
PAMEGET : Kumaha ngomong?
ISPA : Lemes tur lentong
Basa Sunda jadi poho

4
ISTRI : Pileuleuyan abdi rek wangsul ka kampung
PAMEGET : Naha nyai bet nolas?
ISTRI : Memang abdi geus ikhlas
PAMEGET : Naha teu betah di Bandung?
ISTRI : Kapan wakil kaka
PAMEGET : Kaka mah sok lunta
ISTRI : Geuning nganjurkeun
PAMEGET : Keur deungeun-deungeun
ISTRI : Geuning sok harianeun

PAMEGET : Entong kaget, kaka teh tukang anjuran
ISTRI : Perlu contoan
PAMEGET : Loba halangan
ISTRI : Kaka mah licik sorangan
PAMEGET : Nyai henteu rempug?
ISTRI : Bongan elmu ajug
PAMEGET : Nu palinter perlu ngabingbing di desa
ISTRI : Tah-tah atuh jung!
PAMEGET : Leuh.leuh embung
Lain kaka nu rek indit, tapi batur kudu lunta

ISTRI : Abdi sadar, anjuran mah pamandangan
PAMEGET : Tah kitu tah bener, teu salah, ingetkeun
ISTRI : Pandangan keur kamajengan
PAMEGET : Mun sanggup, mun bisa geura prak jalankeun
ISTRI : Abdi mah hoyong di Bandung
PAMEGET : Kaka ge kitu
ISTRI : Nuhun saluyu
IS/PA : Di Bandung riung mungpulung

S A H A ?

1
Saha nu mimiti di sawarga? - Pameget !
Genah mernah betah suka-suka - Pameget !
Dicoba digoda dipelet ku buah kholdi -Pameget-pameget!
Tabeat sok leumpeuh yuni

2
Saha nu nyukakeun Rumah Tangga? - Istri!
Sakapeung ngukusut Rumah Tangga? - Istri!
Pareng keur pasea tetenjrag sarta tetejeh - Istri-istri-istri !
Mun pacental embung eleh

3
Saha anu muluk-muluk jangji? - Pameget !
Basa pangoloan rungga-renggi? - Pameget!
Lamun jual tampang, belaan sok unjam injeum - Pameget-pameget !
Mun bohong teu kirem-kirem

4
Saha nu nyoba nambah kawani? - Istri!
Tandang ngukuhan emansipasi - Istri!
Ngudag “persamaan” dina sagala lapangan - Istri-istri-istri !
Kahareup sieun kumisan

5
Saha nu sumpah tacan rimbitan? - Pameget!
Kantong kosong tapi heheotan? - Pameget
Ninggal istri lenggik, ngadadak hodengna tandang - Pameget-pameget!
Biasa sok “mata kranjang”

6
Dina hari Ibu sok alihan? - Istri!
Erok jadi kabaya-injeuman - Istri!
Sinjang gejed milo, ngalengkah siga nu mabal - Istri-istri-istri !
Beurateun ku “Gelung Pedral”

8
Saha nu sok mindeng rapat peuting? - Pameget!
Ranggem catetan dokumen penting? - Pameget!
Rupa-rupa ekol, alesan dirungga-renggi - Pameget-pameget!
Neang bojo nu teu resmi

9
Saha nu sok biasa dierok? - Istri!
Sakapeung diwedakna camerok? - Istri!
Wedak tilu lapis, rarusuh teu dieunteungan - Istri-istri-istri !
Ditilik jeug careuh bulan

10
Saha nu jumago bobok tarok? - Pameget!
Laga sakecapkadua gaplok? - Pameget!
Digoda gelung, wawanen ngadadak leeh - Pameget-pameget!
Ku istri sok mindeng eleh

11
Saha nu sok sumpah kulat-kelet? - Istri!
Seja ngiring ka liang cocopet? - Istri!
Pareng kurang blanja, nyeuseulan ku matak nyeri - Istri-istri-istri !
Mindeng poho api-api

12
Saha nu jangji siga nu enya ? - Pameget!
Kajeun ancur, batan teu laksana? - Pameget!
Gawe obral sumpah, dipapay nu lelengohan - Pameget-pameget!
Surat kawin satumpukan

13
Saha diacuk ampir buligir? - Istri!
Kajeun kapanasan rada nyengir? - Istri!
Nelepon ti kantor, ngabahas perkara cinta - Istri-istri-istri !
Rukal rikel siasatna

14
Saha nu jangji moal midua? - Pameget!
Sumpah “hanya satu yang kucinta” - Pameget!
Sikep ampuh lungguh pedah mayunan mitoha - Pameget-pameget!
Pinter ngulik “Sandiwara”

15
Saha nu nganggo lancingan panjang? - Pameget!
Oge dipantalon angkat midang? - Istri!
Disahedeng tukung
Digolep-dikreul-diponi - Pameget jeung Istri
Sakapeung mindeng pahili

SANDANG PANGAN

1
- Dipikir wuwuh lalanjung
+ Na naon nu matak bingung?
- (aduh) Aduh ku sandang pangan
+ (itu) Geuning anjeun borangan
- Eee… kapan jeung rencana
+ Eee… mending kuma behna
- Eee… sieun kawalahan
+ Atuh sabar entong getapan
- Baju yeye matak hese, mending erok dijejewet
+ Entong nyonto sambel jahe, dicocol tep-tep tewewet
- Duuuh, kumaha (atuh)
+ Sandang pangan
- Sandang pangan
+ Ieuh makan waktu keur ngolahna

2
- Balanja mindeng teu mahi
+ Har kapan duit sayagi
- (da) geuning sagala mahal
+ (atuh) Mending anjeun tong aral
- Eee… rasa panasaran
+ Eee… tunggu sandang pangan
- Eee… geuning tacan datang
+ Moal tereh-tereh kasorang
- Cabe beureum gula pasir, hargana teu bisa murah
+ kudu peureum bari mikir, sangkan teu loba kasusah
- Duuh, nalangsa (geuning)
+ Sandang pangan
- Sandang pangan
+ Ieuh, panyileukan sarerea

3
- Disawang matak bungangang
+ Tah geuning bangun keur senang
- (geura) Sawang mun sandang pangan
+ (puguh) Lamun geus tinekanan
- Deuuh, abdi bakal surak
+ Deuuh, kaka ge jijingkrak
- Deuuh hirup subur mamur
+ Duit nyesa bisa diatur
- Meuli lawon dua geblog, duitna geus tangtu mahi
+ Erek dahar masing rewog, sapoe dalapan kali
- Deuuh sugema (suka)
+ Barang-barang
- Barang-barang
+ Ieuh, lamun geus murah hargana

4
+ Tah Nyai tambah balanja
- Tah geuning artos timana
+ (ieuh) Kapan tas ti pakgade
- (euleuh) Lucu teu hese gawe
+ Eee… kapan sandang pangan
- Eee… kajeun sarwa kurang
+ Eee… kuma mun teu dahar
- Mending cukup ngucapkeun “sabar”
+ Listrik naek harga ngapung, panghasilan teu nambahan
- Ulah ngojok bari pundung, mending ngupahan sorangan
+ Eeeh, ku sedih (peurih)
- Sandang pangan
+ Sandang pangan
- ieuh, jaga mo burung kapanggih

Bandung, 7 Nopember 1959

SEKAR CATUR

1
Kaka hayu urang sakola - nanya tek matak reuwas
Meungpeung urang jagjag tur ngora - puguh ari kitu tea mah
Mangga urang sasarengan - kamana ?
Nungtut nyiar elmu
Pan keur kamajuan - alus pisan eta ajakan teh

Ieuh, lain Kaka teu hayang - harr na kedah kumaha?
Rasa keukeuh rada salempang - salempang leresan manana?
Najan ujian lugina
Sakola terusna, duh hese katampa - ahh kaka mah kecing
- Naha kaka geuning horeaman
+ Mun teu kitu, sok sieun kawiwirangan
- Duuh kaka, ngeplek jawer ngandar jangjang
+ Sanes kaka ngeplek jawer, ngan kaka teu weleh mangmang

2
Kaka mangga urang diajar - hayu da kawajiban
Meungpeung ngora kedah motekar - meungpeung euweuh pikiraneun
Sangkan hirup teu kasasar - ari kitu!
Kaka ge piraku - Nya teu hoyong jembar
puguh wae hayang pisan

Ieuh Nyai lamun keur ngelmu- kedah kumaha?
Entong make murukusunu - naha da sasari ge tara
Geuning ka Ibu ngarenghik - iraha?
Nangis mudut artos
Leuh ngagaleuh lipstik - lah jijieunan kaka mah

- Geuning kaka bet usilan teuing
+ Lain usil, kaka mah ukur ngelingan
- Duuh kaka, piwuruk kaka katampi
+ Sukur mun daek digeuing, ngan ulah rek deui-deui

3
Lamun kaka sarapan pagi - kudu dahar naon cing?
Poma ulah arek kumaki - sasari ge tara kiju mantega
Mending tuang kulub hui - euleuh atuh!
Gegentos nasi goreng atawa roti - Aduh cilaka pisan ieu mah

Najan seep hui sabaskom - mamayu
Keukeuh rasa beuteung teu cumpon - lah ku rohaka
Lamun tacan manggih sangu - sok kumaha?
Beuteung nagih eusi, lir anu mamayu - sedep tuang we ieu mah
- Saur apa, beas teh paceklik
+ Teu salempang, kapan ngadagoan milik
- Duuh kaka, palawija langkung mirah
+ Lamun kakurangan sangu, peuyeum jeung hui ge ngeunah

4
Nyai masing jongjon sakola - na kirang kumaha
Entong osok mindeng kagoda - wantun sumpah tara
Geuning kamari katara
Keur diiring-iring ku para pamuda - eta mah rerencangan latihan

Ieuh kaka ulah neuteuli - kaka mah budak bageur
Anggur junun nyiar pangarti - moal galider kaka mah
Entong sapertos kamari - na kumaha?
Kaka tepak toel jeung pamudi jengki - euh geus gerak badan eta mah

- Naha geuning nyai ku poyokan
+ Bongan tadi kaka nu ngamimitian
- Duuh Nyai, ulah rek katutuluyan
+ Abdi mah teu pisan-pisan, eta mah mung gogonjakan

".....?????....."

MAKE-UP
+ Nyai mah wanda perceka
- Abdi teu hoyong dipuja
+ Pujian sabalakana
- Asal tong teras ngagoda

+ Arek dijajal diuji
- Sumangga abdi sayagi
+ Menta jawaban nu sieup, Cing naon hartina “make-up?’

Deuh… Bangsa kedok istimewa
Anu bisa mindah rupa
Pipi peot jadi peungkeur
Nini-nini katembong neuhneur

Deuh… Anu tegep tambah geulis
Nu karenyut jadi luis
Sok kalinglap anu nenjo
Make “make-up” sok kabobodo

Keur pulitik : teu asup kana acara
Keur sosial : teu aya hubungan
Ekonomi : nu puguh mahal ongkosna
“make-up” mun geus luntur tembong nu aslina

MAKE-UP
+ Nyai mah ku resep dangdan
- Pan kudu milaras jaman
+ Ku seueur acuk pinilih
- Kapan meser unggal sasih

+ Ayeuna arek diuji
- Sumangga abdi sayagi
+ Menta jawaban nu pasti, Cing naon hartina “You Can See”

Deuh… Eta basa Inggris
Meureun “anjeun bisa nenjo”
Tonggong istri ngagem sinar
Anjeun mencrong teu kudu mayar

Deuh… Tonggong koneng tambah pamor
Kaasupna barang impor
Rok “you can see” pake peuting
“asup angin” henteu dihiding

Keur pulitik : angkeuhan internasional
Keur sosial : ditunggu usaha amal kaasup talajak royal puguh mahal ongkosna
Tong make “you can see “ lamun kurang modal

BIOSKOP
+ Tah Nyai geuning geus ginding
- Pan gaduh acara penting
+ Har kapan geuning keur perlop
- Kapan bade ka bioskop

+ Ayeuna Nyai dijajal
- Sumangga moal rek aral
+ Cing jawab satarabasna, “Bioskop” naon hartina?

Deuh… Rohangan tempat kuliah
Direnceng-renceng garenah
Soal cinta, kajahatan
Nyanyi-tari, kapahlawanan

Deuh… Ongkos kuliah teu mahal
Saletereun moal aral
Ka bioskop tos ngalanggan
Matak lali kana sambetan

Keur pulitik : saeutik nambah kanyaho
Keur sosial : ieu mah kapan lalajo
Ekonomi : sok loba rekening poho
Karcis geus beakeun kapaksa ti calo

HUNTU PALSU
+ Bapa teh keur ngeunah seuri
- Naon anu jadi margi
+ Pan ieu huntu geus ganti
- Paingan ku amis budi

+ Ayeuna Nyai diuji
- Sumangga abdi sayagi
+ Harti kecap “huntu palsu”, Terangkeun anu saestu

Deuh… Dianggo ku para sepuh
Nu gugusina tos uduh
Huntu palsu na gugusi
Nu tos sepuh sok anom deui

Deuh… Kuat nyapek satakerna
Leuwih kuat ti incuna
Onjoyna teh najan kolot
Ngosok huntu bari ngaheot

Keur pulitik : teu kagok dina pidato
Keur sosial : teu asup acara poko
Ekonomi : da lain talajak ogo
Make huntu palsu, dahar beuki ponyo

NV
- Bapa mah bangun nu senang
+ Kapan henteu boga hutang
- Cing atuh abdi tulungan
+ Dapon nyai teu rimbitan

- Cobi bapa rek diuji
+ Pek wae bapa sayagi
- Neda jawaban nu pasti
Cing naon hartosna “NV?”

Deuh… NV, Naamlose Vennootschaap
Rereongan layeut pisan
Tingpucunghul dimamana
Ngeduk untung paloba-loba

Deuh… NV artina “Nieuwe Vrouw”
Anyar keneh ganti bojo
Hawa dunya sok bengbatan
Modal NV pake nanyaan

Keur pulitik : teu aya sangkut pautna
Keur sosial : ditunggu sumbanganana
Ekonomi : mun jujur aya onjoyna
Nu jareneng luhur, tong milu usaha

Bandung, 4 Juni 1960