AYANG AYANG GUNG

Wahyu Wibisana

GENDING
Sababaraha urang lalaki asup ka Pentas bari nanggung pare, tuluy ngawih babarengan

RAMPAK PAMEGET
Moe pare ! Hayu !
Heg tungguan! Enya
Aya hayam ! Gebah
Sieuh! Sieuh!

Ayang ayanggung urang ka saung lisung
Ayang ayanggung nutu pare tang tingtung

Poe Senen geus Senen geus panen
Sa’ nu rek panganten
Kabeh oge urang teh rek pangantenan
Naha isuk na pageto atawa jaga
Nu enggeus mah enggeus bae tong hayang dua

Ti arah sejen ngabring mojang bari ngajingjing halu jeung aya nu mawa nyiru jeung boboko bari ngarawih

RAMPAK ISTRI
Poe Rebo, geus Rebo, geus Rebo
Saha nu hayong jomblo
Kabeh oge urang teh da embung jomblo
Ditanyaan ku si akang moal nembalam
Tapi eta hartina teh abdi ngiringan

Sieuh.. sieuh.. ulah deukeut
Ka ditu geura kalandeuh ( kalandeuh-kalandeuh )
Pare geus di poe
Dipoe geus tilu poe ( Dipoe, dipoe )

Dibuburak sing ka lebak
Hayam jago anu harak ( nu harak, nu harak )

RAMPAK ISTRI
Ulah rek kadieu
Didieu aya nu moe

RAMPAK PAMEGET
Kongkorongok ………………………………
RAMPAK ISTRI
Nu kongkorongok banguna teh hayam lisung
RAMPAK PAMEGET
Nu jangkung
RAMPAK ISTRI
Kumeok eleh ku bikang
RAMPAK PAMEGET
Ngelehan

RAMPAK ISTRI
Nu kongkorongok banguna teh hayam lamba
RAMPAK PAMEGET
Jagona
RAMPAK ISTRI
Ngeplek jawer ngandar jangjang
RAMPAK PAMEGET
Nu gandang

GENDING
Mojang mulak-malik pare, lalaki ngarengkenek asup deui ka pentas tuluy ngawih patembalan jeung mojang-mojang

RAMPAK PAMEGET
Urang jait geus garing pare nu urang
Tuh nyeletrok meujeuhna mun ditutuan
RAMPAK ISTRI
Enya hempek bangkat, bangkat
Bangkat tuh ka lisung
RAMPAK PAMEGET
Sok bantuan ulah sok licik sorangan
Tah geugeusan tungtutan hempek akutan
RAMPAK ISTRI
Kapan tadi kuring, kuring
Kuring nu nungguan

RAMPAK PAMEGET/ISTRI
Babarengan, Hayu! Sauyunan, Hayu!
Mawa pare, Hayu!, Urang tutu
Ayang ayanggung urang ka saung lisung
Ayang ayanggung nutu pare tang tingtung

Pare anyar! bodas, pare anyar! beureum
Pare ketan hideung, keur opakeun
Ayang ayanggung urang ka saung lisung
Ayang ayanggung nutu pare tang tingtung

GENDING
Mojang nutu pare bari tutunggulan, pameget narakolan kohkol make bedog siga nu keur meulahan suluh.

RAMPAK PAMEGET
Anu nutu gentak-gentak
Isikan heg gancang nyangu
Pare anyar, pare anyar
Sing asak-asak ngakeul
Sing asak-asak ngakeul

Suluhna gancang tampolan
Bisi euweuh eukeur nyangu
Pare anyar, pare anyar
Sing asak-asak ngakeul
Sing asak-asak ngakeul

GENDING
Tutunggulan paselang jeung sora nu nampolan suluh, silih reret silih delek, pada pada saling taksir. Salah saurang mojang nyaritakeun batur salemburna nu sejen ngadengekeun

AS ISTRI 1
Nyi Jua nyaba ka kota
Jeung Uana numpak roda
Balikna teh mawa encit
Mani agul gunat-genit
RAMPAK PA/IS
Leuh euleuh euleuh euleuh
Kumaha tah tuluyna

AS ISTRI 1
Encitna teh encit beureum
Dikaput sakabayaeun
Nyi Jua gawena midang
Ngahelaran tukang pindang
RAMPAK PA/IS
Hahahahahahah heuheuheuheuheuheuheuh
Hahahahahahah heuheuheuheuheuheuheuh

Kabiasaan mun geus nyaritakeun batur sok tutuluyan, mojang nu sejen asa kaingetan tuluy nyarita

AS ISTRI 2
Naha maneh geus nyaraho
Nyi Jumi meh kabobodo
Bogoh ka tukang galendo
Marukan teu boga bojo
RAMPAK
Leuh euleuh euleuh euleuh
Kumaha tah tuluyna

AS ISTRI 2
Nyi Jumi kungsi diontrog
Ku awewe mawa bedog
Paseana mani ragot
Silih jenggut silih totog
RAMPAK
Hahahahahahah heuheuheuheuheuheuheuh
Hahahahahahah heuheuheuheuheuheuheuh

AS PAMEGET 1
Lah hayang hayang dicalana gober
Heg nyaba nyabana teh da ka Bandung
RS ISTRI
Ber ka Bandung calana gober bau sigung
Ber ka Bandung calana gober bau sigung

AS PAMEGET 2
Lah hayang hayang dicalana gober
Heg nyaba nyabana teh da ka Batawi
RS ISTRIBer Batawi calana gober bau tarasi
Ber Batawi calana gober loba daki

RS PAMEGET
Ojok ojok ata utu
Ngojok ngojok nu keur nutu
RS ISTRI
Tong ganggu tong ganggu
Tong ganggu kami keur nutu
Tong ganggu tong ganggu
Kapalang kami keur nutu

RS PAMEGET
Ojok ojok uang aung
Ngojok ngojok nu disaung
RS ISTRI
Tong heureuy tong heureuy
Tong heureuy apan pamali
Tong heureuy tong heureuy
Di dieu lain tempatna

GENDING
Mojang-mojang beberes hasil pagawean, barudak lalaki pon kitu deui, selang-selang bari nyirian mojang nu ditaksirna.
RAMPAK PA/IS
Leuweung teuneut cocongoan
Jalanna ka Rajagaluh
Meungpeung deukeut sosonoan
Boa isukan pajauh

AS ISTRI 3
Nyi Jumi, nyi Jumi
Tong ngadelekan
Ngadelekan ieuh ka kai Uhan

AS ISTRI 4
Nyi Jumi, nyi Jumi
Tong make hayang
Kai Uhan ieuh kumisna carang

RS ISTRI
Omat pisan nyi Jumi tong make hayang
NYI JUMI
Moal, moal
RS ISTRI
Ka Uhan kapan kumisna teh carang
NYI JUMI
Moal, moal
RS ISTRI
Moal naon moal naon
NYI JUMI
Moal poho kanu carang

RS PA/IS
Kaliki tangkal kaliki
Cangkudu keur karembangan
Lalaki urang lalaki
Kudu gancang beubeunangan

AS PAMEGET 3
Jang Adun, jang Adun
Tong ngadelekan
Ngadelekan leuh ka Nyai Kayah
AS PAMEGET 4
Jang Adun, jang Adun
Tong make hayang
Nyai Kayah ieuh gede karangna

RS PAMEGET
Omat pisan jang Adun tong make hayang
JANG ADUN
Moal, moal
RAMPAK SEKAR
Ka Nyi Kayah karangna sagede Ahad
JANG ADUN
Moal, moal
RAMPAK SEKAR
Moal naon moal naon
JANG ADUN
Moal poho kana karang
Mojang jeung Bujang kaluar pentas sapasang-sapasang bari ngawih babarengan

RAMPAK SEKAR
Kleung angkleung sagara ombak-ombakan
Keueung ninenung sangsara ge babarengan

RENGSE ………………..

SAMAGAHA

Naskah Carita : Wahyu Wb.
Naskah Karawitan: Mang Koko

ADEGAN 1
Caang Bulan…….. Barudak lalaki rek ucing "Kalangkang"

RS BUJANG/MOJANG
Caang bulan ngebrak siang
Nini anteh diwedak kawas parawan
Cing ucingan jeung kalangkang
Ucing saha nyi lanjang eong-eongan

RS BUJANG
Cing cangkeling, manuk cingkleung cindeten
Plos ka koong bapa Satar ………………………….
Cing cangkeling, manuk cingkleung cindeten
Plos ka koong bapa Satar buleneng

ADEGAN 2
Barudak lalaki ucing kalangkang, silih intip-silih bongohan……
Cahaya buian beuki surem, beuki poek….. barudak ting raringeuh jeung tingtarunjuk ka langit.saurang-saurang lumpat ti dinya, daratang bari marawa jeung nakolan kohkol. Mojang kalaluar sanggeus ngadenge sora kokhol jeung tingjorowok Samagaha

RS BUJANG
Euleuh-euleuh bulan dilegleg ku yaksa
Euleuh-euleuh SAMAGAHA…SAMAGAHA.

RS MOJANG
Hayu batur urang gancang gareuwahan
Buru-buru Tutunggulan.. Tutunggulan

ADEGAN 3
Kaayaan beuki poek..medem, sora kohkol jeung alat liana beuki rame, salah saurang budak lalaki mawa obor nyaangan mojang-mojang nu rek tutunggulan ngaliwatan cukang kawung muru lisung.
RS MOJANG
Poek mongkleng kundang obor
Kaluncas kalinces
Kahalangan ku kalangkang
Ngalengkah .. diwangwang ..

Nece kana cukang kawung
Ngarayap jeung muntang
Halu dijingjing dikeumbing
Ka saung . . ka lisung . .

ADEGAN 4
Mojang breng tutunggulan, disambil karakawihan, ditempas ku lalaki anu narakolan kohkol jeung pager..

RS. MOJANG/BUJANG
Sieuh ! Sieuh ! Buta julig
Ulah nglanto kalangit
Bulanna geura utahkeun
Matak weureu mun diheungheum

Sieuh ! Sieuh ! Buta wereng
Langit kuring poek peteng
Nini Anteh kapaehan
Rek ngabungbang poek bulan

ADEGAN 5
Lalaki ngaludar sarungna anu tadina disalendangkeun.. diayun-ayun kaluhur, maksudna nyingsieunan Yaksa … Mojang-mojang oge selang-selang tina tutunggulan, ngacung-ngacung haluna, bari taranggah.

RS MOJANG
Diajul ku halu !
RS PAMEGET
Naonana ?
RS MOJANG
Saleserna !
RS PAMEGET
Ambeh naon ?
RS MOJANG
Ambeh murag, huy ! huy !

RS PAMEGET
Meureunan nyeurieun ?
RS MOJANG
Da bonganna !
RS PAMEGET
Bongan naon ?
RS MOJANG
Bongan gembul !
Ngakan bulan, huy ! huy !

ADEGAN 6
Hiji lalaki ngeker ka langit … nu sejenna narunjuk ka luhur

AS BUJANG 1
Bulan digegel ku buta
Naha atuh gugal gegel
Ulah sagegel-gegelna
Mun lain gegelenana, nya Nyai !
RS BUJANG
Seuhah lata-lata, maling cabe lada ngeunah

AS BUJANG 2
Gorek-gorek manuk tuweuw
Disada dina taweuran
Dinu poek resep reujeung
Lila ge teu panasaran, nya Nyai !
RS BUJANG
Seuhah lata-lata, maling cabe lada ngeunah


ADEGAN 7
IBING TUTUNGGULAN .. Mojang-mojang pabisa-bisa tutunggulan kawas nu hayang kataksir ku bujang. Bujang-bujang alemprak bari sila rupa-rupa.

RS BUJANG
Ting tung ting tung
Tak tuk tak tuk tak
Nu di saung dipacok ku bango butak

RS MOJANG
Blang dung blang ding
Blang dung blang dingkleung
Anu ngibing kumis baplang digadekeun

ADEGAN 8
IBING SARUNG… Bujang-bujang pabisa-bisa ngulinkeun sarungna, kawas nu hayang kataksir ku mojang-mojang anu keur ngulinkeun haluna
Teu lila salah saurang mojang nunjuk ka langit nu sejen milu taranggah

AS MOJANG
Tuh geus melentis nu koneng nu geulis
Bulan ! Bulan ! tereh nembongan

RS MOJANG/BUJANG
Bulantis-bulantis
Bulanna enggeus melentis
Bulan .. Bulan..

Bulanbong-bulanbong
Bulanna enggeus katembong
Bulan Bulan

ADEGAN 9
Saeutik-saeutik beuki katembong caang …. Para mojangjeung bujang taranggah ka langit. Kabeh narunjuk ka bulan.

RS. MOJANG/BUJANG
Bray ! .. Bray ! .. Bray !
Bulan geura bray caang

Trang trang kolentrang
Trang trang kolentrang
Trang trang kolentrang
Caang bulan ngebrak siang

ADEGAN 10
Hiji lalaki mawa Kacapi …. Ditabeuh, babaturanana ngariung nu ngacapi.. salah saurang Nyuling ……. Mojang-mojang nyarukang kana cukang kawung sanggeus narunda halu….

AS MOJANG
Ngabungbang urang ngabungbang
Meungpeung caang bulan
Impian endah impian
Duh … kalangkang bulan

RS MOJANG
Putri wengi panineungan
Imut di langit kasmaran
Eling di bumi kasmaran
Tepang dina caang bulan
ADEGAN 11
Salah saurang lalaki maledogkeun kembang ka palebah riungan Mojang-mojang. Kembang the diparebutkeun.
Mojang-mojang dariuk dina bale-bale bari arucang angge… bujang-bujang ngarengklak ngigel nuturkeun lagu ucang angge

RS. MOJANG
Ucang-ucang angge
Loba bujang diparanje
Digogog ku anjing Lebe
Menta tulung ka awewe
RS BUJANG
Ari gog-gog cungungung
Ari gog-gog cungungung

RS MOJANG
Ucang-ucang angge
Aya bujang di pakgade
Diudag-udag mang lebe
Ongkos kawin tacan mere
RS PAMEGET
Ari gog-gog cungungung
Ari gog-gog Auuuuuuuuuuu ….

ADEGAN 12
Palebah sora Auuuu.. bujang-bujang ngarontok mojang-mojang. Mojang tapis pisan ngagiwar-nyingcet. Bujang-bujang katipu patumpuk nepi ka iketna lalesot. Ngaras era tuluy dikebut-kebut pasang aksi

RS BUJANG
Caringcing pageuh kancing
Saringset pageuh iket
Sret sret sret
Sret sret sret

Nya akang tameng dada
Anu nyaah ka nyai
Het het het
Het het het

ADEGAN 13
Mojang ngarumpul ditengah.. barudak lalaki pacekel-cekel rek ngajaring mojang. Teu kaburu kasambungkeun da mojang-mojang kaburu nyaringcet kaluar tina jaring nu dijeun ku barudak lalaki.

RS. Bujang
Rek meuting dinu jangjing
Rek modok dinu denok
Weh weh weh
Weh weh weh

Nya akang jaga malem
Hudang mun digeuingkeun
Dudingkeung dudingkeung

ADEGAN PANUTUP
Ibing dina gending Tokecang……..
Kaluar pentas.


Permata Mega, 21 April 2003.

KENTRUNG HARIRING

( Nano. S )
GENDING
Para pamuda asup ka pentas bari mawa halu, gerakan diluyukeun jeung gending.

PARA PAMUDA :
Tamaha jadi lalaki
Kudu bisa nyieun halu
Haluna, haluna kuat lir beusi

Dipake nutu di lisung
Sorana angin-anginan
Ngelentrung, matak nineung ka nyi mojang

Alah kentrung,kentrung, aduh rame pisan
Alah kawel- kawel, aduh tapis pisan
Najan rame teu pabeulit
Sukuna tara ti kait
Najan ripuh teu rumahuh
Sumawona hahah-huhuh
Paling, paling aduh nyeri cangkeng
Alah kentrung-kentrung……..fade out…..

GENDING
Selang tina ngarengsekeun nyieun halu, gantian nyaritakeun pangalamanana

PAMUDA 1
Basa Nyi Emeh keur nutu
Ngalamun kadagor halu
Huntuna………………
Murudul satilu-tilu

PAMUDA 2
Basa nyi Icih keur napi
Gubag-gibeg pasang aksi
Haluna………………..
Teu pupuguh nyintreuk ceuli

PAMUDA 3
Nyi Ijah milihan serah
Katinggang lebaheun sirah
Bareuhna……………..
Melendung sagede gajah

PAMUDA 4
Nyi Mumu gawena kerung
Bangun anu nyeri beuteung
Gorobasssssssss
Logodor sagede halu

PAMUDA 5
Nyi Ijur peuting ngalindur
Salaki dijieun halu
Anehna………………….
Salakina seuseurian

PARA PAMUDA
Hahahahahahah – heuheuheuheuheuheuh……..antarlina……

GENDING
Keur rame seseurian salah saurang pamuda ninggali aya mojang nu rek ngaliwat tuluy nyarita kanu sejena


PAMUDA 1
Leuh euleuh tuh aya nyi mojang !
PARA PAMUDA
Cing mana ?
PAMUDA 2
Duh mani hezo
PARA PAMUDA
Arek hezo arek koneng
Ka nyi mojang tetep hayang
PAMUDA 1
Mun kadieu rek kumaha ?
PARA PAMUDA
Acuh wae sabab butuh
PAMUDA 1
Leuwih hade urang goda
PARA PAMUDA
Akur pisan mending kitu

GENDING
Ngaliwat nyi mojang duaan atawa tiluan ka hareupeun para pamuda, ku para pamuda tuluy diheureuyan.

PARA PAMUDA
Neng ! neng ! neng ! neng !
Sora loceng…….pasti eraeun

GENDING
Mojang nu ditanya tadi mah rek atoh tapi kusabab diheureuykeun tuluy ting kelemes tapi teu ingkah ti pentas. Teu lila ngaliwat deui mojang duaan, siga nu tadi ku pamuda diheureuyan.

PARA PAMUDA
Nyi !, Nyi ! , Nyi !, Nyi !
Nyiruan tuh !

GENDING
Mojang nu diheureuyan ngadeukeutan baturna nu tadi diheureuyan. Ti arah sejen datang nyi mojang nu gaya leumpangna jiga peragawati.

PARA PAMUDA
Aduh lucu persis peragawa………
Teu ah…………..

GENDING
Para pamuda ting cikikik, seuri ku tingkah lakuna sorangan geus hasil ngaheureuyan nyi mojang. Mojang-mojang baraeud tuluy ngambeuk.

PARA MOJANG
Asa teu gugur teu angin
Jeung asa kamalinaan
Cunihin teh kaleuwihan
Siga nu kurang saeundan
Aya naon ? aya naon ?
Cing pek ngomong anu bener !

PARA PAMUDA
Manawi peryogi halu
Sae pisan kanggo nutu

PARA MOJANG
Tayoh pantes ka patutna
Sirah batu kawas halu

PARA PAMUDA
Rumaos akang mah hipu
Kagaduh mung ukur halu

PARA MOJANG
Ngomong kalah beuki ngaco
Polah api-api bodo
Kami tetep henteu suka
Anjeun kudu tanggung jawab

GENDING
Ngarasa kadeseh para pamuda tuluy ngomong kana halu masing-masing, miceun ka era ti dituna mah pedah diseukseukan ku para mojang

PARA PAMUDA
Da maneh mimitina
Jadi sayah katempuhan
Ari geus kieu kumaha
Ngomong-ngomong !

Ieuh kuring teh arisin
Isin isin tuh isin ku lisung

GENDING
Para mojang ngarasa heran jeung hayang seuri ninggali kalakuan para pamuda teh, sok sanajan kitu tetep can mere budi ka para pamuda

PARA PAMUDA
Moal sakali-kali deui..Hah !
Awas diwartoskeun ka Abah
Hayoh nyuhunkeun dihapunten
Sok sok da moal nananon !

PARA MOJANG
Kalakuan pangakalan
Kalakuan panipuan
Kalakuan teu uyahan
Kahayangna diwawuhan

PARA PAMUDA
Kadangu henteu
Tuh anjeunna bendu
Socana mani baruleud

Ayeuna kieu
Da maneh nu boga dosa
Maneh nu tanggung jawabna ( bari nunda halu tuluy indit )

PARA MOJANG
Pasti…eraeun….
PARA PAMUDA
……Enya……

GENDING
Sanggeus para pamuda indit ti dinya, para mojang rupa-rupa tingkahna aya nu mupuas tapi aya oge nu boga rasa kaduhung.

MOJANG 1
Kami mah jadi kaduhung
Geus nyarekkan leuwih teuing
Sok sieun raheut hatena
Ngaganggu kana jiwana

MOJANG 2
Lalaki kitu kuduna
Supaya kapok jadina
Sabab mun terus diantep
Boga rasa ieu aing

MOJANG 3
Tapi mun ngukur dosana
Bet asa teu sabaraha
Kumaha atuh jadina
Sangkan teu goreng akhirna

MOJANG
Halu dipake gantina
Nurutan cara manehna
Urang pake tutunggulan
Ciri urang sauyunan

PARA MOJANG
Akur akur
Nu goreng lain jalmana
Tapi kalakuanana
Hayu rawatan ayeuna

GENDING
Para mojang ngarawatan halu nu tinggaloler, para pamuda daratang ti tukangeunana bari seuri leutik,barang mojang-mojang rek jung pisan nangtung ku para pamuda dibetahkeun. ( Catetan : alusna dina adegan ieu make lisung, tuluy tutunggulan, keur jongjon tutunggulan karek para pamuda kaluar ti tukangeun bara mojang )

PARA PAMUDA
Tah kitu alus
Diurus ti leuleutik
Geus gede mulang tarima
(halu diturunkeun rek ditunda deui)
His naha kitu
Teu kedah isin-isin
Teraskeun….teraskeun….

GENDING
Ku sabab era, para mojang tuluy mencrong jeung nyarekkan halu sewang-sewangan.

PARA MOJANG
Da maneh mimitina
Jadi kami katempuhan

Henteu kudu sindir sampir
Ngomong ngomong

Aeh aeh bet ngabetem
Awas moal dipasihan…..

PARA PAMUDA
Apem
PARA MOJANG
Kadangu henteu
Tuh anjeunna surtii
Kiceupna siga kelenci
PARA PAMUDA
Kelencina moal kabur
PARA MOJANG
Nya ceuk kami oge
Mun daria pek balaka
PARA PAMUDA
Isin keneh

GENDING
Bari silih tunjuk jeung silih surungkeun para pamuda nitah salah saurang wakilna pikeun ngadeukeutan para mojang

PAMUDA 1
Cing halu kuring contoan
PARA PAMUDA
Mimitina …. Weh !

GENDING
Ku sabab para mojang teu mere respon, salah saurang pamuda para mojang disindiran

PAMUDA 2
Sayang cantik-cantik aga tuli
Telinganya mungkin kelebihan gizi
Sayang kalau musti dioperasi
Telinganya lucu seperti kelinci

GENDING
Pikeun ngawanohkeun pihak para pamuda jeung para mojang, salah saurang api-api jadi pagawe telkom, gerakanana siga nu masang kabel telepon jeung nu masang telpon tuluy dicoba ku manehna teu lila dibikeun ka salah saurang baturna supaya nelepon para mojang.

PAMUDA 4
Halow halow …nyi Omoh nih !
Oke oke oke
PARA PAMUDA
Ok ak ok ey ok ak ok ey
PAMUDA 4
Sssssst……. salam sayang buatmu seorang
Cup cup cup…
PARA PAMUDA
Aji no moto
PAMUDA 4
Heueuh ..heueuh…dah Omoh……
Apa ? kang Ibro ?…ada… sebentar yah….

GENDING
Telepon dibikeun ka salah saurang pamuda nu jadi Ibro, tuluy Ibro nelepon legeg pisan

PAMUDA 5
Halao halao..saya Ibro nih..!
Selamat subuh…….
Ohhhhhhh…Nyi Ijur nih !
Halo…. ( jur )
Apa kabar ( jur )
Ah engga ( jur )
Makan tebu ( jur )

PARA PAMUDA
Halow … halow… ( bari ngadeukeutan para mojang )
Cantel yu !

GENDING
Para mojang tetep pengkuh can daek ngalayanan para pamuda. Ku sabab kitu tuluy para pamuda tinglaleos tapi bari nanya ka dirini sugan jeung sugan dijawab ku para mojang

PARA PAMUDA
Upamina ieu mah
Nu pasea wawuh deui
Cing kedah dikumahakeun ?
PARA MOJANG
Ditaros !

PARA PAMUDA
Upamina ieu mah
Hoyong teras silih asih
Cing kedah dikumahakeun

PARA MOJANG
Ditarosan
Upamina ieu mah
Ditarosan pareng kersa
Cing kedah dikumahakeun ?
PARA PAMUDA
Dieleketek……

Akang mah geus pageuh jangji
Moal boga pamajikan iwal ka anu sahiji
Anu meulit dina ati

PARA MOJANG
Leuh euleuh euleuh
Na saha tea ?

PARA PAMUDA
Sanes sasaha….kapan salira

PARA MOJANG
Duka atuh
PARA PAMUDA
Akang cinta
PARA MOJANG
Ngemut heula
PARA PAMUDA
Kedah kersa
PARA PAMUDA
Lamun henteu
PARA PAMUDA
Kedah mangga
PARA MOJANG
Lamun mangga
PARA PAMUDA :
Itu diaaaa

PARA MOJANG/PAMUDA
Dengkleung dengdek – dengkleung dengkleung dengkleung
Dengkleung dengdek – dengkleung dengkleung dengkleung

PARA MOJANG
Lamun moal daek
PARA PAMUDA
Akang ngeleketek
PARA MOJANG
Lamun abdi daek
PARA PAMUDA
Kulan
PARA MOJANG
Daek
PARA PAMUDA
Kulan
PARA MOJANG
Daek
PARA PAMUDA
Kulan
PARA MOJANG
Daek !
PARA PAMUDA
Akang ngarengkenek
( mimitina lalaunan supaya teu kadengeun ku para pamuda, tapi beuki lila beuki tarik malah antukna mah dijorowokeun )

PARA MOJANG:
Kade nya ulah ngabohong
PARA PAMUDA
Moal
PARA MOJANG
Kade nya tong mangnyerikeun
PARA PAMUDA
Moal
PARA MOJANG
Kade nya midua hate
PARA PAMUDA
Moal
PARA MOJANG
Kade nya cing nyaah pisan
PARA PAMUDA
Moal……
( para mojang neunggeul para pamuda, para pamuda sadar yen jawabanana salah tuluy tingcorowok nyebut bade bari ngudag para mojang nu ting laleos ti dinya )
PARA PAMUDA: Bade…bade..bade….

GENDING PAMUNGKAS

NGABUNGBANG

NANO. S

ADEGAN 1
Nu ngaronda narahkolan kohkol ngurilingan kampung bari tetep tatan-tatan sayaga

RS BUJANG
Gan Ronda Malam
AS BUJANG
Ngaronda ngajaga lembur
RS BUJANG
Masing iatna
AS BUJANG
Bisi aya Pancabaya

RS BUJANG
Gan Ronda Malam
AS BUJANG
Cing kulinting ngajaga peuting
RS BUJANG
Anu karulem
AS BUJANG
Damel naon cik abdi ngiring

GENDING RONDA MALAM
Selang-selang tina nakol kohkol, ngarawih ngingetan ka masyarkat sangkan sare tong talibra teuing

RS LALAKI
Tanghi… Tanghi…
Tanghi…. Tanghi….
Sare tong tibra teuing
Kudu bari caringcing
Kade poho
Panto can ditulakan
Tanghi…… Tanghi…Tanghi ….. Tanghi

GENDING RONDA MALAM
Bari angger nakolan kohkol pindah tempat ting corowok ka unggal jurusan

RS LALAKI
Tanghi… Tanghi…
Tanghi…. Tanghi….
Bisi seuneu can pareum
Kade tong waka peureum
Bisi budak can sare
Tong waka rek digawe
Tanghi…. Tanghi…Tanghi…. Tanghi

Nu ngaronda ninggalkeun tempat

ADEGAN 2
Ti arah sejen kaluar mojang-mojang rek Ngabungbang

RS MOJANG
Caang bulan moncorong
Satujuan ngabungbang
Suka gerah lugina
Sauyunan sasuka
Hayu-hayu gumbira babarengan
Seuyang-seuyang duh seuyang ngahariring

Ngadon mandi di landeuh
Kade aya beubeureuh
Ngadon ngintip cunihin
Teu uyahan bulasin
Hayu-hayu gancangan tatan-tatan
Seuyang-seuyang duh seuiyang ngahariring

ADEGAN 3
Teu lila datang nu Ngaronda, ngintip lalaunan, tuluy ngarajleng, ngareuireuwas para Mojang. Mojang-mojang reuwaseun, tuluy neangan paneunggeul, kabeneran aya halu. Lalaki rada reuwaseun sieun digebuk ku halu, tuluy undur-unduran.
TUTUNGGULAN


BUJANG 1
Tuh Adun nu beulah ditu
Arek mepeg kana hulu
Awakna lintuh bayuhyuh
Dewek mah resep nu lintuh

BUJANG 2
Yeuh Emed milih tong salah
Tadi beunang anu tengah
Jangkung begang ngalekeceng
Hampang najan buntang banting

BUJANG 3
Duh Salim dewek mah ratug
Jajantung teh asa urug
Cacakan ukur kadupak
Etana teh mani euyak

BUJANG 4
Lah alah kakara sidik
Manehna teh rada dekok
Tapi sakitu mah jamak
Bisa ditambal ku wedak

BUJANG 5
Lah alah kuring mah rieut
Manehna beuki camberut
Pipina mani samutu
Siga nu ngaheungheum huut

RAMPAK BUJANG
Tong ringrang, tong sieun
Sagalana layanan

Yu deukeutan urang hareureuyan
Sugan ngalayanan jadi batur papasangan

Susut biwir ngomong ulah nyengir
Kade bau hanyir bisi ditakol gegendir

Teuneung ludeung najan kudu perang
Cadu pantrang mulang komo deui ka nyi mojang


ADEGAN 4
GENDING
Lalaki ngadeukeutan Nyi mojang rek ngeheureuyan, para mojang tatan-tatan sayaga rek neunggeulekun halu.

BUJANG BUJANG
Keur istri mah henteu kenging liar peuting
MOJANG MOJANG
Usilan !
BUJANG BUJANG
Liar peuting ceuk pa Dukun liar cacing
MOJANG MOJANG
Poyokan !
BUJANG BUJANG
Liar cacing gede beuteung melendung sagede gentong
MOJANG MOJANG
Bajingan !

BUJANG BUJANG
Ka pameget henteu kenging bujang bajing
MOJANG MOJANG
Paduli !
BUJANG BUJANG
Margi bajing sok bajingan kana pipi
MOJANG MOJANG
Teu risi
BUJANG BUJANG
Pameget mah gaduh bajing disimpena dina tonggong
MOJANG MOJANG
Da wani !

BUJANG BUJANG
Ka pameget omat ulah wani teuing
MOJANG MOJANG
Da nguntup
BUJANG BUJANG
Anu nguntup biasana sok karungkup
MOJANG MOJANG
Teu surup !
BUJANG BUJANG
Geus karungkup sok ngarangkep jeung akang tangtu ngahiji
MOJANG MOJANG
Yeu peureup

BUJANG BUJANG
Samarukna ari peureup henteu teuas
MOJANG MOJANG
Geus nyaho !
BUJANG BUJANG
Ditinggangkeun kana irung bisi mejrel
MOJANG MOJANG
Sabodo
BUJANG BUJANG
Aduh enung buah ati bojo akang meureun pegek
MOJANG MOJANG
Heh ngolo !


ADEGAN 5
GENDING
Para mojang tetep pengkuh teu daek diheureuyan, malah katingalina beuki sewot. Lalaki badami tuluy ngatur siasat

RS LALAKI
Diheureuyan teu daekkeun
Disindiran bet malikeun
Akalna dikumahakeun
Sangkan daek ngalayanan

Dilemesan ku asihan
Ditiupan ku omongan
Karesepna para mojang
Dipuji bari diolo

ADEGAN 6
Pamuda badami saha nu rek jadi pupuhu ngolo para mojang, salah saurang jadi wakil maranehna. Bari mamandapan ngadeukeutan para mojang


AS BUJANG
Punten bae Eulis akang ngaganggu
Kumawantun aya maksad
Jauh dijugjug anggang diteang
BUJANG BUJANG
Seja nyanggakeun salam perkenalan

MOJANG MOJANG
Yey, yey, yey, yey, ke heula
Kami teu biasa
Da lain kitu carana
Sopan santun adat Sunda

BUJANG BUJANG
Euleuh euleuh euleuh euleuh
Ulah waka bendu
Sugan teh atos uninga
Cara pamuda ayeuna
Mun rek kenal titip salam

MOJANG MOJANG
Yey, yey, yey, yey, teu eudeuk
Moal rek ngarempak
Najan ganti robah jaman
Moal nuturkeun nu gundam

BUJANG BUJANG
Sanes gundam Eulis tapi modern
Parobahan kaayaan
Anu teu milu pasti tinggaleun
Disebut jalma kuuleun

MOJANG MOJANG
Hayang disebut modern
Nurutan anu teu uni
Cenah ngudag kamajuan
Geuning poho harga diri

BUJANG BUJANG
Ieu nyai tilu milyar lima dolar
Benten pisan jeung sarebu

MOJANG MOJANG
Conto teh kudu nu hade
Ulah sagawayah wae
Banda batur diampihan
Nu sorangan dialungkeun

BUJANG BUJANG
Banda akang ti baheula oge pageuh
Asa henteu pindah-pindah

MOJANG MOJANG
Cunihin
BUJANG BUJANG
Sawios
MOJANG MOJANG
Teu uyahan
BUJANG BUJANG
Sawios
MOJANG MOJANG
Sing ngarti
BUJANG BUJANG
Da ngartos
MOJANG MOJANG
Bet cicing
BUJANG BUJANG
Da raos

MOJANG MOJANG
Lalaki cengeng elehan
Gumasep leuwih ti monyet
Balaga nandingan Oa
Nurustunjung kawas lutung

ADEGAN 7
Rumasa asa dihina, lalaki demonstrasi nemongkeun sagala kabisana, tuluy nangtang sagala kahayang para mojang


BUJANG BUJANG
Tong loba carita
Nih punya kabisa
Soal apa saja
Kaga usah ngecer

Macam-macam elmu
Neneng boleh coba
Tidak usah takut
Akang orang kuat
Mau tenaga lahir
Mau tenaga batin
Ini nih jagonya
Coba maunya apa ?

MOJANG MOJANG
Orang yang memang jago
Tidak seperti beo
Bicara sembarang gampang
Seperti setengah gila

Tapi engga apalah
Kita ingin mencoba
Siapa tahu memang bener jagoan
Kita tidak penasaran

ADEGAN 8
Ngarasa meunang respon, kabeh lalaki ngarigel atoh


MOJANG MOJANG
Ntar dulu
BUJANG BUJANG
Ada apa
MOJANG MOJANG
Ada perlu
BUJANG BUJANG
Perlu apa
MOJANG MOJANG
Ingin tahu
BUJANG BUJANG
Tahu apanya
MOJANG MOJANG
Tahu otaknya
MOJANG MOJANG
Takut dibelah


MOJANG MOJANG
Bukan begitu
BUJANG BUJANG
Oh bagaimana
MOJANG MOJANG
Kesini dulu
BUJANG BUJANG
Senang sekali
MOJANG MOJANG
Kita mulai
BUJANG BUJANG
Saya menanti
MOJANG MOJANG
Coba lakukan
BUJANG BUJANG
Patuh disiplin

ADEGAN 9
Lalaki-lalaki sikepna ajeg luyu jeung kahayang msing-masing, siap narima parentah ti para mojang. Para mojang mariksa sikep hiji-hiji lalaki.

MOJANG MOJANG
Cing coba ayeuna menca
Mencana menca nu hade

BUJANG BUJANG
Alah-alah pilakadar menca
Jurus ini tarik itu
Nyai pasti jatuh hati

Tu wa ga pat hwek puuuh
Sing kafelet hwek puuh
Masing asih ka awaking
Awaking nu beuki daging
Masing nyaah kana raga
Nya raga nu beuki kuya
Hsgytrhkhugyhtwssswserhgy ( babacaan teu pararuguh siga nu jajampean )

MOJANG MOJANG
Cing ayeuna make gelut
Gelutna gelut enyaan

BUJANG BUJANG
Alah, alah pilakadar gelut
Nu ngajago bisa bengo
Ini Rambo jago yudo

ADEGAN 9
Lalaki-lalaki pakupis maenpo teu puguh alang ujurna tuluy garelut siga nu enya, para mojang rada rareuwas kasieunan jadi gelut enyaan.

RS MOJANG


RS LALAKI


RS MOJANG
RS LALAKI
RS MOJANG
RS LALAKI

RS MOJANG
RS LALAKI
RS MOJANG
RS LALAKI

MOJANG MOJANG
Gelut mah dunyana tipu
Kami mah henteu satuju

BUJANG BUJANG
Ngarah urang satujuan
Mending ngigel babarengan

MOJANG MOJANG
Ah malu belum bisa
BUJANG BUJANG
Akang pasti membimbing
MOJANG MOJANG
Sok sieun teu uyahan
BUJANG BUJANG
Tinggal ngagulaan

MOJANG MOJANG
Bolehlah coba-coba
BUJANG BUJANG
Itu tandanya suka
MOJANG MOJANG
Jangan sok bikin malu
BUJANG BUJANG
Kita sama-sama tahu

ADEGAN 10
Lalaki ngarengklak ditingalikeun ku para mojang, ku sabab cicing bae para mojang dipaksa


BUJANG BUJANG
Ayolah, ayolah
Mari kita mulai
MOJANG MOJANG
Sabar dong bang
Nanti saya ikuti

BUJANG BUJANG
Ayolah, ayolah
Mari kita lakukan
MOJANG MOJANG
Baiklah baiklah
BUJANG BUJANG
Jangan sok malu kucing

ADEGAN 11
Tungtungna mah ngarengklak sapasang-sapasang, teu lila marulang sewang-sewangan.


GENDING PANUTUP

Megabrata 74
Poe Kemis, 7 Maret 2002